"NEWS” агентлаг энэ удаа “ХҮМҮҮС” буландаа Өмнөд Солонгосын жүжигчин, дуучин Пак Бо-гумыг онцолж байна. Түүний гол дүрд нь тоглосон "Netflix"-ийн уянгын цуврал болох "When Life Gives You Tangerines" яг одоо дэлхий нийтийг байлдан дагуулж буй. Ийнхүү өнөө цагийн к-драмагийн тод одтой танилцъя.

ДУУЧИН БОЛОХ МӨРӨӨДӨЛТЭЙ ТАМИРЧИН

Пак Бо-гум 1993 оны зургадугаар сарын 16-ны өдөр Сөүл хотноо мэндэлжээ. Тэрбээр эхээс гурвуулаа бөгөөд айлын хамгийн бага. Түүнийг дөрөвдүгээр ангид байхад ээж нь таалал төгсч, хүүхдүүд аавтайгаа үлдсэн аж. Цэцэрлэгт байхаасаа л төгөлдөр хууртай найзалсан Бо-гум дуучин, ая зохиогч болох мөрөөдөлтэй байв. Үүнийхээ хажуугаар усан сэлэлтийн спортоор хичээллэж, дунд сургуулийнхаа шигшээ багт хүртэл багтсан амжилттай. Ингээд харахаар "When Life Gives You Tangerines" цувралын нэгэн анги дээр усан онгоцноос үсэрч, эрэг дээрх хайрт бүсгүй рүү сэлэхэд асуудал байгаагүй харагдана.

Ахлах сургуульдаа Бо-гум агентлагт сонгогдохын тулд төгөлдөр хуур тоглонгоо дуулж буй бичлэгээ сонгон шалгаруулалтад илгээдэг байлаа. Энэ нь ч үр дүнгээ өгч, хэд хэдэн агентлагаас санал тавьжээ. Дуучин болох мөрөөдөлтэй байсан хүү агентлагийнхаа тавьсан саналыг хүлээн авч, жүжигчин болохоор шийдэв. Ахлах сургуулиа төгсмөгцөө Мёнжи их сургуулийн хөгжимт театрын ангид элссэн гэнэ.

Алдарт "YG"-ийн захирал асан Ян Хён Согт хожим дурсахдаа Бо-гумыг агентлагтаа аваагүйдээ харамсдаг гэж байжээ.

ЖҮЖИГЧИН БОЛООД ДАМПУУРСАН НЬ

"Sidus HQ" агентлагийн жүжигчин болсон Бо-гум 2011 онд анхны дэлгэцийн бүтээлдээ дүр бүтээжээ. "Blind" кинонд туслах дүр бүтээсэн залуу жүжигчин дараа нь "Blossom Entertainment"-тай гэрээ байгуулж, "Runway Cop", "Bridal Mask" зэрэг уран бүтээлүүдэд ажиллав. Улмаар 2013 онд анхны гол дүрээ авч, "Wonderful Mama" цувралын гол од болов.

2014-2015 онуудад залуу жүжигчин цахиур хагалж, "A Hard Day" кино нь тэсрэлт хийжээ. Гэхдээ сайны хажуугаар саар гэгчээр 2014 онд дампуурлаа зарлав. "Soompi" сайтын мэдээлснээр Бо-гумын аав нь 800 сая воны зээл авахдаа хамтран зээлдэгчээр нь хүүгээ бүртгүүлжээ. Харамсалтай нь зээлээ цаг тухай бүрт нь төлж чадаагүй аж. Гэхдээ удалгүй энэ асуудал намжиж, дахин яриа гараагүй юм.

Бо-гумыг алдар нэрд хүргэсэн дэлгэцийн бүтээл бол "Reply 1988". 2016 онд тэрбээр бүхий л шилдэг жүжигчний шагналыг хүртэж, жинхэнэ утгаараа од болжээ. Өхөөрдөм төрх, сайхан инээмсэглэл, бүтээсэн дүрээс нь улбаалан солонгосчууд түүнийг "Үндэсний дүү" гэж хочилдог гэнэ.

ЦЭРГИЙН АЛБА ХААВ

Пак Бо-гум 2020 онд цэргийн албанд татагдаж, тэнгисийн цэргийн бие бүрэлдэхүүний нэг хэсэг болжээ. 2021 онд түрүүч цол хүртээд зогсохгүй үсчний гэрчилгээтэй болсон гэнэ. Харин 2022 онд цэргээс халагдан эргэн урлагийн замналаа үргэлжлүүлсэн түүхтэй. Түүний хувьд Францын тансаг зэрэглэлийн "Celine" брэндийн олон улсын элч болсон анхны жүжигчин болсон аж.

2022 онд "Blossom Entertainment"-тай байгуулсан гэрээ нь дуусгавар болж, удалгүй "The Black Label"-тай гэрээ байгуулжээ. Энэ бол бид бүхний сайн мэдэх "When Life Gives You Tangerines" цувралд дүр бүтээх эхлэл байсан юм. Гван Шикийн дүр өдгөө Азийн орнуудыг байлдан дагуулж, "Хүн бүр өөрийн Гван Шикийг олоорой" гэх үг хүртэл од болж байна. Түүний дараагийн дэлгэцийн бүтээл нь олимпийн алтан медальт боксчин залуугийн тухай өгүүлэх "Good Boy".

ХУВИЙН АМЬДРАЛ

Бо-гумын үерхлийн яриа үе үе олны анхаарлыг татдаг. Албан ёсны мэдэгдэл гараагүй ч түүнийг Сүзи, Ким Ё-жүн, Сон Хи-гёо нартай нэр холбож байв. Сүүлд хүртэл "When Life Gives You Tangerines" цувралд хамтран тоглосон "IU"-тай нэр холбожээ.

Бо-гум болон "BTS" хамтлагийн V нар тун сайн найзууд. Тэд KBS телевизийн "Music Bank" нэвтрүүлгийн үеэр танилцаж, хобби болон ижил сонирхлоороо найзалжээ.