АНУ-ын Бостон хотноо 2025 оны уран гулгалтын ДАШТ болж өндөрлөлөө. Энэ удаагийн дэлхийн аваргад Орос, Беларусиас бусад бүхий л улс орны шилдгүүд оролцов. Хамгийн сонирхол татаж байсан төрөл болох эмэгтэйчүүдийн ганцаарчилсан ангилалд АНУ-ын 19 настай тамирчин Алиса Лью түрүүлэв. Түүний хувьд богино болон чөлөөт үзүүлбэртээ нийт 222.97 оноо авчээ. Харин мөнгөн медалийг гурван удаагийн дэлхийн аварга Японы Каори Сакамото, хүрэл медалийг мөн Японы тамирчин Монэ Чиба хүртсэн аж.

Ердөө хоёрхон жилийн өмнө их спортоосоо зодог тайлж байсан Алиса Лью мөсөн талбайдаа эргэн ирсэн нь зөв шийдвэр байжээ. Анх удаагаа дэлхийн аварга болсон Лью хэвлэлд өгсөн ярилцлагадаа "Миний туулсан бүхний дараа энэ мөч надад их зүйлийг өгүүлж байна. Өөрийн хамгийн шилдэг хоёр үзүүлбэрээ үзүүлсэнд туйлын баяртай байна. Би өмнө нь гаргасан шийдвэртээ харамсахгүй байна. Тийм шийдвэр гаргасандаа баяртай байна. Тэр шийдвэр л өнөөдрийн энэ мөчийг надад авчирлаа" гэжээ.

Тэгвэл эрэгтэйчүүдийн ганцаарчилсан ангилалд таамаг ёсоор АНУ-ын тамирчин Илья Малинин түрүүлэв. Өдгөө 20 настай, Узбекистан гаралтай, Орост төрсөн тэрбээр хоёр жил дараалан дэлхийн аварга боллоо. Түүний араас Казахстаны Михайл Шайдоров, Японы Юма Кагияама нар мөнгө, хүрэл медаль хүртжээ.

Бүжгийн төрөлд АНУ-ын хос болох олимп, дэлхийн аварга Мэдисон Чок, Эван Бэйтс нар алтан медалийн буухиагаа үргэлжлүүлэв. Тэдэнтэй хамт медалийн тавцанаа Канадын Пипер Гиллс, Пол Пойрье болон Их Британийн Лила Фир, Льюис Гибсон нар зогсчээ.

Хосын төрөлд Японы Рикү Миүра, Рюүчи Кихара нар алтан медаль, Германы Минерва Фабиен Хасе, Никита Володин нар мөнгө, Италийн Сара Конти, Никколо Мачи нар хүрэл медаль тус тус хүртэв.

АНУ-ын тамирчид эх орондоо болсон дэлхийн аваргын дөрвөн төрлийн гуравт нь түрүүлсэн амжилт үзүүлжээ.