Исландын баруун өмнөд хэсэгт галт уул дэлбэрч, улбар шар, улаан өнгөтэй лаав цацаж эхэлжээ. Галт уулын лаав 1.2 км урттай газарт асар том ан цав үүсгээд байна. Энэ нь 2023 оны арваннэгдүгээр сарын 11-ээс хойш хэмжигдсэн хамгийн урт нь байжээ. Мөн өдрийн турш галт уулын бүсэд хэд хэдэн газар хөдлөлт болжээ.

Тиймээс жуулчид болон оршин суугчдыг бүс нутгаас нүүлгэн шилжүүлэв.

Дэлбэрсэн галт уул нь загасчны хот Гриндавик болон алдарт "Blue lagoon"-ы ойролцоо байдаг. Бүс нутгийн оршин суугчид бүхэл амьдралаа галт уулын дэргэд өнгөрүүлсэн тул хэзээд гараад явахад бэлэн байдаг. Энэ удаад газар хөдлөлтийн ойр давтамж зэрэгцсэн тул нөхцөл байдал илүү түгшүүртэй байсныг оршин суугчид хэлж байна. Хүмүүсийг яаралтай нүүлгэн шилжүүлэх гэсэн ч зарим хүн нүүхээс татгалзжээ.

Гриндавикт 30 жил амьдарсан иргэний хэлэхээр 2024 оноос хойш галт уулын дэлбэрэлт идэвхжиж, улам эрсдэлтэй болсон байна. 4000 орчим оршин суугчийн дийлэнхийг нь галт уулын идэвхжилийн аюулын улмаас 2023 онд бөөнөөр нь нүүлгэн шилжүүлсэн. Үүнээс хойш галт уул хэд хэд дэлбэрсэн билээ.

Дашрамд дурдахад, тус бүс нутагт өнгөрсөн оны арваннэгдүгээр сард нэг өдрийн дотор 800 орчим газар хөдлөлтийн чичиргээ бүртгэгдсэн. Улмаар газар хөдлөлтийн чичиргээ хэдэн долоо хоног үргэлжилсний эцэст арванхоёрдугаар сарын 18-нд Рейкьянес хойгт галт уул дэлбэрчээ. Үүнээс хойш галт уул ойр ойр давтамжтай дэлбэрсээр, энэ удаагийнх найм дахь нь болж байна.