НЭМЭЛТ: 

УИХ дахь Ардчилсан намын бүлэг ээлжит бусаар хуралдаж байна. Тус хуралдаанд Ерөнхий сайд Л.Оюун-Эрдэнэ оролцож байгаа бөгөөд Авлигатай тэмцэх газар/АТГ/-ын даргаар З.Дашдавааг улираан томилох саналтай байгаагаа бүлгийн гишүүдэд танилцуулжээ.

УИХ дахь МАН-ын бүлэг өнөөдөр мөн ээлжит бусаар хуралдан, Ерөнхий сайдын дээрх саналыг хүлээн авч дэмжсэн байдаг.

МАН, АН-ын бүлэг ээлжит бусаар хуралдаж байна

Долоо хоног бүрийн Даваа гаригт УИХ дахь намын бүлгүүд хуралддаг. Уг товлолын дагуу өнгөрсөн Даваа гаригт намын бүлгүүд хуралдсан. Тэгвэл өнөөдөр /2025.04.02/-нд УИХ дахь МАН болон АН-ын бүлэг 11 цагт дахин хуралдах тов гарсан байна. Учир нь өнөөдрийн Засгийн газрын хуралдаанаар хэлэлцэж байгаа Монгол Улсын нутаг дэвсгэрээр дамжуулан Оросын Холбооны Улсаас Бүгд Найрамдах Хятад Ард Улс руу байгалийн хий нийлүүлэх хоолой барих төслийн явцын талаар, Уул уурхайн бүтээгдэхүүний экспорт, валютын нөөцийн нөхцөл байдлын талаар, Төмөр замын баруун, зүүн коридор байгуулах талаар, “НҮБ-ын Хөгжлийн бэрхшээлтэй хүмүүсийн эрхийн хорооноос Монгол Улсад ирүүлсэн зөвлөмжийг 2025-2031 онд хэрэгжүүлэх үйл ажиллагааны төлөвлөгөө батлах тухай” Засгийн газрын тогтоолын төсөл, Иргэдээс төрийн захиргааны төв болон нутгийн захиргааны байгууллага, албан тушаалтанд хандан 2024 онд гаргасан өргөдөл, гомдлын шийдвэрлэлтийн талаар зэрэг 25 асуудалтай холбоотой гарсан шийдвэрийг намын бүлгээрээ хэлэлцэхээр тогтсон байна.

Тухайлбал, АТГ ын дарга З.Дашдавааг Ерөнхий сайд Л.Оюун-Эрдэнэ бүрэн эрхийнхээ хүрээнд улираан томилох шийдвэр гаргаснаа танилцуулсан байна. Мөн 39 ордыг стратегийн жагсаалтад оруулах асуудлыг өнөөдрийн Засгийн газрын хуралдаанаар хэлэлцсэн.

Тиймээс эдгээр шийдвэрүүдтэй холбоотой ийнхүү намын бүлгүүд ээлжит бусаар хуралдаж байна. Намын бүлгүүдээс гарсан шийдвэрийн талаар бид эргэн мэдээллэх болно.