БНХАУ-ын арми, тэнгисийн цэрэг, агаарын болон пуужингийн хүчин хамтарсан цэргийн сургуулилт хийж буйгаа Мягмар гаригт (2025.04.01) мэдэгдэв. Ялангуяа Тайванийн усан хил рүү аажмаар ойртож, сургуулилт хийж буйг Хятадын армийн зүүн командлалын албанаас онцолсон байна.

Мөн агаар болон тэнгисийн цэргийн хүчин байлдааны бэлэн байдлыг сахих журмаар эргүүл хийх болно гэж холбогдох албаны хүн мэдээлсэн бөгөөд энэ нь хамтарсан ажиллагааны чадварыг шалгаж, гол бүс нутаг болон далайн замыг хаах дадлага байх болно гэжээ.

Ажиглагчдын үзэж буйгаар, энэхүү сургуулилт нь Тайванийн салан тусгаарлах хүчний эсрэг хатуу анхааруулга, хүчтэй саад хийх зорилготой юм. Тэр дундаа энэхүү сургуулилт нь Хятадын бүрэн эрхт байдал, үндэсний эв нэгдлийг хамгаалах хууль ёсны бөгөөд зайлшгүй арга хэмжээ юм гэж зүүн командлал мэдэгджээ.

Өнгөрсөн сард мөн адил Хятадын хүчин Тайванийг тойрон сургуулилт хийсэн байна.

Бээжингийн хувьд эдгээр цэргийн үйл ажиллагааг хэвийн зүйл мэт ойлгуулахыг хичээж буй. Мөн эдгээр алхмаараа Тайванийн ерөнхийлөгч Лай Чин Тегийн засаг захиргаа болон АНУ-д анхааруулга өгч байгаа бололтой. Дашрамд дурдахад, Хятад улс Тайванийн эрх баригч Ардчилсан дэвшлийн намыг тусгаар тогтнолын төлөөх хүчин гэж буруутгадаг юм.