Юн Сук Ёлыг Өмнөд Солонгосын ерөнхийлөгчөөр сонгогдож байх үед хамгийн ойрын зөвлөх нь байсан Чан Жэ Вон нас барсан байдалтай олдсон гэдгийг тус улсын цагдаа нар Мягмар гаригт (2025.04.01)мэдэгдэв. Тодруулбал, Чан Жэ Воны цогцсыг Сөүл хотын Гандонг-гу дахь оршин суудаг газраас нь Даваа гаригт олсон байна. Ямар нэгэн гаднын нөлөө, хүн амны хэргийн ул мөр, нотлох баримт олдоогүй ч Чан Жэ Вон өөрөө бичсэн байх магадлалтай зурвас олджээ. Улмаар түүнийг амиа хорлосон байж болзошгүй гэж үзэж байна.

Түүний хувьд 2024 он хүртэл Пусан хотын Сасанг-гу тойргийг төлөөлж гурван удаа сонгуульд өрсөлдөж, ялалт байгуулсан хууль тогтоогч байсан бөгөөд хуучинсаг үзэлтэй гэдгээрээ олонд танигдсан аж.

2015 оны арваннэгдүгээр сард Бусаны Дижитал Их Сургуулийн дэд деканаар ажиллаж байхдаа эмэгтэй хүн хүчирхийлсэн гэх хэрэгт буруутгагдаж байжээ. Мөн нэгдүгээр сард тухайн үед нарийн бичгээр ажиллаж байсан эмэгтэйг согтууруулах ундаа хэрэглэсэн үед нь хүчирхийлсэн гэж буруутгагдсан байна. Гэсэн хэдий ч Чан Жэ Вон бүх хэргийг үгүйсгэж, гэмт хэрэг үйлдээгүй гэж мэдэгдэж байжээ. Түүнчлэн, Чан Жэ Вон өөрийн харьяа намаасаа гарах тухайгаа илэрхийлэхэд эрх баригч нам нь болох Ардын хүчний нам болон бусад хууль тогтоогчид нь эсэргүүцсэн байдаг.

Тухайн үед эрх баригч намын нөхөд нь гэмт хэрэг гарсан газар Чан Жэ Вон байгаагүй гэж мэдэгдсэн юм.

Гэвч хэргийн талаар сурвалжилж байсан "JTBC" агентлаг хүчингийн хэрэг гарсан гэх өдрийн өглөө нэгэн зочид буудлын өрөөнд нарийн бичиг эмэгтэй өөр нэгэн хүнтэй харилцаж буй видео бичлэгийг Даваа гаригт (2025.03.31) нийтэлжээ. Уг видео бичлэгийг үзсэн олон нийт Чан Жэ Вон тухайн эмэгтэйтэй ярилцаж байна гэж таамаглах болсон юм. Мөн уг видео бичлэг дээрх эмэгтэй хүчирхийлүүлсэн гэдгээ нотлох бүх ДНХ-ийн нотлох баримтуудыг хадгалсан гэж мэдэгдсэн бөгөөд Мягмар гаригт хэвлэлийн бага хурал зарласан ч Чан Жэ Воны үхэлтэй холбоотойгоор хойшлогдоод байна.

Өмнөд Солонгосын хуулийн дагуу ихэнх  хүчингийн гэмт хэргийн хөөн хэлэлцэх хугацаа нь 10 жил байдаг аж.

Чан Жэ Вон нь улс төрийн өндөр нэр хүндтэй Чан Сонг Мэний хоёр дахь хүү юм. Чан Сонг Мэн нь 1987-1988 онд Үндэсний ассамблейн гишүүн, дэд даргаар ажиллаж байсан бөгөөд Пусан Дижитал Их Сургууль зэрэг байгууллагуудыг удирддаг Дунсео боловсролын санг байгуулсан. Харин Чан Жэ Вон 2008-2012, 2016-2024 онд хууль тогтоогчоор ажиллаж байсан бөгөөд 2022 оны гуравдугаар сараас мөн оны тавдугаар сар хүртэл ерөнхийлөгчийн шилжилтийн үед Юн Сук Ёлын ахлах туслахаар ажиллаж байв.