Зохицуулалттай салбарын “Компанийн засаглалын кодекс”-ийн хэрэгжилтийн үнэлгээний 2024 оны нэгдсэн судалгаа гарсан талаар Санхүүгийн зохицуулах хорооноос өнөөдөр /2025.04.01/ мэдээллээ. Санхүүгийн зохицуулах хорооноос зохицуулалттай этгээдийн кодексийн хэрэгжилтийн үнэлгээний тайланг хянан баталгаажуулахад, 2023 оны жилийн эцсийн байдлаар дунджаар 84.9 хувийн гүйцэтгэлтэй байсан. Компани тус бүрт зөвлөмж, чиглэл, хугацаатай үүрэг өгч, тогтмол сайжруулалт хийсний үр дүнд өнгөрсөн оны жилийн эцсийн байдлаар кодексийн хэрэгжилт салбаруудад дунджаар 1.7 хувиар өссөн ахиц дэвшлийг үзүүлжээ.

Санхүүгийн зохицуулах хорооноос “Компанийн засаглалын кодекс”-ыг шинэчлэн баталснаар нээлттэй хувьцаат компаниудаас гадна даатгагч, итгэлцлэлийн үйлчилгээ эрхлэгч банк бус санхүүгийн байгууллага,  хөрөнгө оруулалтын менежментийн компаниуд дагаж мөрдөх үүргийг хүлээсэн байна.

Кодексийн хэрэгжилтийг үнэлэх, үнэлгээний нэгдсэн тайлан, судалгаа гаргах болон салбарын засаглалын зэрэглэл тогтоох нь компанийн засаглалын чиг хандлага, эрсдэлийг тодорхойлох, салбартаа засаглалаар тэргүүлэгч компаниудыг тодруулах ач холбогдолтой. Мөн кодексийн хэрэгжилтийн үнэлгээ, нэгдсэн судалгааг тогтмол хийснээр үнэлгээний дүнг компанийн засаглалын нөхцөл байдалд дүн шинжилгээ хийх, зохицуулалтын орчныг боловсронгуй болгоход ашиглах давуу талтай аж.

“Компанийн засаглалын кодекс”-ийн хэрэгжилтийн 2024 нэгдсэн судалгаатай энд дарж танилцах боломжтой.