"Багануур" ХК-ийн удирдлагууд ЭМЯ-д гомдол гаргажээ

Нийслэлийн Багануур дүүрэгт шалтгаан тодорхойгүй хордлогод хоёр хүн өртөж, нэг хүн нь харамсалтайгаар нас барсан. Эрүүл мэндийн яамнаас өнгөрсөн амралтын өдөр мэдээлэхдээ хордлогод өртсөн хүмүүс тархвар судлалын асуумжаар метилийн спирт уусан байж болзошгүй талаар мэдээлсэн юм. Тэгвэл "Багануур" ХК-ийн удирдлагууд энэ мэдээллийг үгүйсгэж байгаа юм. Өнөөдрийн байдлаар сэхээний тасагт хэвтэн эмчлүүлж буй "Багануур" ХК-ийн нэг ажилтны бие сайжирч байгааг тус компанийн захирал Д.Түвшинжаргал мэдээллээ.

Тэрбээр "Энэ оны гуравдугаар сарын 28-ны өглөөний 10.28 цаг орчимд манай үйлдвэрийн эмчид Багануур дүүргийн эрүүл мэндийн төвөөс "Танай компанийн ажилтан байж магадгүй хоёр хүн яаралтай түргэн тусламжаар ирж, эрүүл мэнд нь хүнд байна. Ирж уулзана уу" гэсэн. Дуудлагын дагуу манай компанийн дэд захирал, хэлтсийн дарга, эмч гэсэн гурван хүн очиход харамсалтай нь нэг ажилтан нас барж, нэг ажилтны биеийн байдал хүнд байсан. Ингээд бид бүхэн дүүргийн Эрүүл мэндийн төвийн эмч нартай уулзаж, зөвлөгөө авч ажилласан. Бид үүнтэй холбоотойгоор "Багануур" ХК-ийн 1153 уурхайчнаас асуумж, авсан. Мөн энэ талаар олон нийтэд ташаа мэдээлэл өгсөн Эрүүл мэндийн яаманд гомдол гаргасан" гэв.

Сүүлийн жилүүдэд архи, спиртэд хордож нас барсан тохиолдол нэмэгдсэн буюу 2020 онд 650 тохиодол байсан бол 2022 онд 1071 болж нэмэгдсэн гэдгийг албаныхан мэдээлсэн юм.