Италийн нийслэл Ромын захад байрлах "Тесла"-ийн салбарт Даваа гаригийн өглөө гал гарч, дор хаяж 17 машин шатжээ. Тухайн үед салбарт хэн ч байгаагүй тул хүн бэртэж гэмтээгүй.

Ромын гал сөнөөх албаныхан галын шалтгааныг тодруулахаар ажиллаж байгаа бөгөөд энэ нь санаатай үйлдэл байхыг үгүйсгээгүй байна.

Элон Маск, Трамп нарыг эсэргүүцэгчид "Тесла"-ийн машиныг эвдсэн, шүршигч будгаар сүйтгэсэн хэрэг сүүлийн үед цөөнгүй гарсан. Энэхүү цуврал үймээнийг Ромд болсон явдал үргэлжлүүлж байна.

Ромд "Тесла"-ийн машин шатсан явдал долоо хоногийн өмнө бас гарсан. Тодруулбал, өөр нэгэн авто дилерийн газарт гал гарч 30 машин шатахад дунд нь "Тесла"-ийн машинууд багтсан байжээ. Галын шалтгааныг цахилгааны гэмтэл гэж нэрлээд буй ч мөрдөн байцаалт үргэлжилсээр байна. Мөн Италийн ерөнхий сайд Жоржиа Мелонигийн өссөн Гарбателлад "Тесла"-ийн машинууд халдлагад өртсөн хэд хэдэн тохиолдол гарчээ. Мелони, Маск нарыг дотно найзууд гэдэг ч болсон явдлын талаар Италийн ерөнхий сайд ямар нэг тайлбар хийгээгүй байна. Милан дахь "Тесла"-ийн салбарууд ч бас сүүлийн хэдэн долоо хоногт байгаль орчны бүлгүүдийн овоо хараанд өртөөд байна.

Италиас гадна Франц, АНУ-д ч бас "Тесла"-ийн машинууд халдлагад өртсөн тохиолдлууд гарчээ. Мөн АНУ дахь "Тесла"-ийн хэд хэдэн байршилд "Элон Маск явах ёстой" гэсэн уриа лоозонтой жагсагчид тайван жагсаал өрнүүлж байна.