Гадаадын иргэдийг Төвөдийн нутаг дэвсгэрт нэвтрүүлэх бодлогод оролцсон Хятадын албан тушаалтнуудад АНУ визний нэмэлт хязгаарлалт тавьж байгааг Төрийн нарийн бичгийн дарга Марко Рубио Даваа гаригт мэдэгдэв. Тэрбээр "Хятадын Коммунист нам АНУ-ын дипломатууд, сэтгүүлчид болон бусад олон улсын ажиглагчийг Төвөдийн өөртөө засах орон болон Төвөдийн бусад бүс нутаг руу нэвтрүүлэхээс хэтэрхий удаан хугацаанд татгалзсаар ирсэн. АНУ Төвөдөд зорчиж буй иргэддээ ч үйлчилгээ үзүүлэх боломжгүй байдаг. Ийм харилцан ойлголцолгүй байдлыг хүлээн зөвшөөрч, тэвчих боломжгүй" гэжээ. Иймд дипломат ажилтнуудад Төвөдийн нутаг дэвсгэрт хязгаарлалтгүйгээр нэвтрэх боломж олгохыг Хятадад уриалсан байна.

Уг мэдэгдэлд Хятадын ямар ч албан тушаалтны нэрийг дурдаагүй. Түүнчлэн АНУ-ын зүгээс авах арга хэмжээний талаар ч дэлгэрэнгүй мэдээлэл өгөөгүй.

Хятад улс 1950 онд Төвөдийг хяналтдаа авсан. Төвөдийг феодалын боолчлолоос энх тайван замаар чөлөөлөгдсөн гэж Хятад тодорхойлдог. Гэвч хүний эрхийн байгууллагууд болон цөлөгдсөн идэвхтнүүд Төвөдийн нутаг дэвсгэр дэх Хятадын дарангуйлагч засаглалыг буруушаасан байр суурьтай байдаг.

АНУ-ын хувьд Төвөдийг Хятадын нэг хэсэг гэж хүлээн зөвшөөрдөг. Гэхдээ ард түмний шашин шүтэх эрх чөлөөг хүндэтгэж, засгийн газрын хөндлөнгийн оролцоогүйгээр шашны уламжлал, хэлээ хадгалах, дадлагажуулах, сургах, хөгжүүлэх боломжийг төвөдүүдэд олгохыг АНУ-аас Хятадын эрх баригчдад удаа дараа уриалж байжээ.