АНУ-ын ерөнхийлөгч Дональд Трамп америкчуудыг энтертайнмент салбарын тасалбарын мөлжлөгөөс хамгаалах тушаалд гарын үсэг зуржээ. Тодруулбал, энэ нь тоглолтын тасалбарыг бөөнөөр урьдчилан авч, дамлан зарахаас сэргийлэх тушаал юм. Энэхүү тушаал нь цахим тасалбарын борлуулалтыг сайжруулах, өрсөлдөөний хууль тогтоомжийг хэрэгжүүлэхэд чиглэнэ.

Даваа гаригийн орой Зууван танхимд болсон гарын үсэг зурах ёслолд урлагийнхны төлөөлөл Кид Рок оролцжээ.

Зарлигийн хүрээнд тасалбар худалдан авах үйл явцын бүх үе шатанд үнийн ил тод байдлыг хангах, шударга бус үйлдлээс урьдчилан сэргийлэх зорилгоор тасалбарын хоёрдогч зах зээлд үнэлгээ хийх, шаардлагатай бол албадлагын арга хэмжээ авна. Мөн Төрийн сангийн яам, Хууль зүйн яам, Холбооны худалдааны комисс гэсэн гурван агентлаг асуудлыг засахын тулд ямар арга хэмжээ авснаа 180 хоногийн дотор тайлагнан мэдүүлэх ёстой болжээ.

Трамп сонгуулийн кампанит ажлынхаа үеэр тасалбарын өндөр үнэтэй тэмцэнэ гэж амлаж байв. Аль нэг уран бүтээлчийн үнэнч шүтэн бишрэгчид нь тасалбарын өндөр үнээс болж боломжоос таслагдаж үлддэг өнөөгийн тогтолцоог маш харамсалтай гэж тэр тодорхойлсон юм. Трамп америкчуудын амьдралыг баялаг болгох урлаг, уран сайхны салбарыг аль болох хүртээмжтэй байлгахыг эрмэлздэг гэдгийг Цагаан ордны албан тушаалтан хэлжээ.

Амьд тоглолт, энтертайнмент салбар нь АНУ-ын эдийн засагт 132.6 тэрбум ам.долларын ашиг оруулдаг. Мөн 913 мянган ажлын байрыг дэмждэг аж.

Гэтэл тасалбарын дамын наймаа уран бүтээлчдэдээ ч, үзэгчдэд ч ашиггүй байдаг тул үүнийг зохицуулах шаардлагатай гэж Трамп үзэж байна. Албаны эх сурвалжийн мэдээлснээр шүтэн бишрэгчид тасалбар худалдан авахын тулд ердийн үнээс 70 дахин илүүг төлсөн ч тохиолдол гарчээ.