БНХАУ-ын "China Media Group" (CMG)-ийн Хятадын Програмчлалын төвөөс Хайнань мужийн Гадаад харилцааны яамтай хамтарч, "Шинэ чанарын бүтээмжтэй хүч ба Хятадын шинэчлэл" арга хэмжээг зохион байгууллаа. Уг арга хэмжээний үеэр тус улсын технологи, хиймэл оюун ухаан, дижитал энтертайнмент хэрхэн өсөн дэвшиж буйтай Ази, Евро-Ази болон Номхон далайн орнуудаас хүрэлцэн ирсэн төлөөлөгчид танилцсан юм.
ДАЛАЙ ДООР ГАЗАР ХӨДЛӨЛТ ИЛРҮҮЛЭХ "5G" ТЕХНОЛОГИ
Хятад улс усан доорх газар хөдлөлтийг хянах зорилгоор "5G" сүлжээний технологийг ашиглаж эхэлжээ. Энэ нь далайн ёроолд тектоник хавтангийн хөдөлгөөн илэрч буйг түргэн шуурхай мэдээлэх зориулалттай аж. Улмаар далай тэнгисийн бүс нутагт орших улс орнуудад тун удахгүй газар хөдлөлт идэвхжиж, цунами үүсч болзошгүйг бодит цаг хугацаанд анхааруулах зорилготой. Өдгөө Монгол Улс болон Соломоны аралтай хамтран ажилладаг болохыг Өмнөд Хятадын тэнгис судлалын үндэсний хүрээлэнгийн далайн хамтын ажиллагааны судалгааны мэргэжилтэн Лин Ёнгшин онцлон тэмдэглэсэн юм. Тэрбээр хэлэхдээ, "Хятадын аюулаас урьдчилан сэргийлэхийн тулд хэрэгжүүлж буй сүүлийн үеийн дэвшилтэт нээлт гэж тодорхойлж болно" гэж "5G" сүлжээг усан дор ашиглаж буйг тайлбарласан байна.
ТЭНГЭРИЙН ОДОД МЭТ ҮЗЭГДЭЛ: ДРОН ГЭРЛИЙН ҮЗҮҮЛБЭР
Энэхүү арга хэмжээний үеэр олон зуун синхрончлогдсон дронууд тэнгэрт динамик 3D хөдөлгөөнт дүрсийг бүтээж, дроны гэрлийн үзүүлбэрийг харуулсан. Энэхүү үзүүлбэр нь Хятад улсын дрон технологийн ур чадварыг бататгасан төдийгүй үзвэр үйлчилгээ, логистик, ухаалаг хотын менежменттэй хэрхэн уялдуулж болох талаар тайлбарлав. Дэвшилтэт технологийн хөгжиж буй салбарын хувьд нам болон өндөр уулын даралтыг үл хайхран, дроны хүчин чадлыг сайжруулж, илүү шинэлэг болгох зорилт тавьжээ. Хятадын иргэний нисэхийн удирдлагын (CAAC) урьдчилсан мэдээгээр, 2025 он гэхэд Хятадын нам нам дор эдийн засгийн зах зээлийн цар хүрээ 200 тэрбум ам.доллар давж, 2035 он гэхэд 480 тэрбум ам.долларт хүрэх төлөвтэй байна. Эрэлт хэрэгцээ нь өсөн нэмэгдэж буй энэ салбарын нэг төлөөлөгч бол "EFY (Hainan) Technology Co., Ltd" бөгөөд томоохон хотуудад өөрсдийн бүтээсэн дроноор төрөл бүрийн дүрсийг харуулах үзүүлбэр зохион байгуулсан байв. 2019 онд Хайнань мужийн Санья хотын Яажоу Бэй Шинжлэх ухаан, Технологийн хотод үйл ажиллагаагаа эхэлснээс хойш Хятад, АНУ, Япон, Өмнөд Солонгос, Арабын нэгдсэн Эмират, Бахрейн, Малайз, Индонез, Алжир зэрэг дэлхийн 200 гаруй хотод үйл ажиллагаа явуулж, чанарын өндөр түвшний технологид анхаарлаа хандуулж байна. Өнгөрсөн таван жилийн хугацаанд тус компани 2000 гаруй үзүүлбэр үзүүлж, 800 мянга гаруй нислэг үйлдэж байжээ.
ДИЖИТАЛ БҮТЭЭЛЧ БАЙДАЛ: "NEZHA"-ГИЙН ДЭЭД ЗЭРГИЙН "CGI"
Арга хэмжээнд мөн дэлхийн томоохон бокс оффист тэргүүлж буй "Nezha" хүүхэлдэйн киноны "CGI" найруулагч Янг Бо оролцсон юм. Тэрбээр анимейшн киног бүтээхэд хувцасны материал, үсний ширхэг бүр ямар их цаг хугацаа, хичээл зүтгэл, ур чадвар шаардагддаг болохыг онцолсон юм. Тухайлбал, "Nezha 2" киног бүтээхэд 100 гаруй хүүхэлдэйн киноны студи, 4000 гаруй "CGI" мэргэжилтнүүд хамтарчээ. Тэдгээрийн дотроос Шүжоу Шида Танчэн соёлын хөгжлийн ХХК-ийн визуал эффект хариуцсан захирал Ян Бо өөрийн баг хамт олонтой хамтарч "Nezha 2"-ийн хамгийн ээдрээд зураглалуудыг бодит мэт дүрслэхийг хичээсэн байна. Жишээлбэл, луугийн хааны дүрд "Light Pillar" эффект ашиглаж, уг дүрийн үйлдэл бүрийг алдаа мадаггүй зурах гэж дөрвөн сарыг зарцуулсан байна.
УХААЛАГ РОБОТ
"Hangzhou Yunshenchu Technology Co., Ltd" группийн "DEEP Robotics"-ын маркетингийн брэнд менежер Чиан Шиаоюй хиймэл оюун ухаант роботын өрсөлдөөнд Хятадын өсөн нэмэгдэж буй байр суурийг онцлон харуулав. Ялангуяа аврах ажиллагаа, хүнд ажиллах нөхцөлд хэрхэн роботыг эрсдэлээс хамгаалах журмаар ашиглах боломжтойг онцлон тэмдэглэв. Энэ хүрээнд тус компани "Jueying Lite 3" хэмээх шинэ үеийн робот нохойг танилцуулж, хурдацтай хөдөлгөөн, өндрөөс харайх, түлхэлт, цохилтын тэсвэртэй байдлыг нь үзүүлэв. Мөн гамшгийн үед хариу арга хэмжээ авах, тандалт хийх чадвартай болохыг Чиан Шиаоюй тайлбарласан юм. Түүнчлэн уг робот нохойноос гадна эрс тэс орчинд зориулагдсан "Mountain Cat" роботыг сайжруулах зорилт тавьсан байна. Эдгээр инноваци нь бүх салбар дахь аюултай, олон давтагдах уйтгартай ажлуудыг өөрчлөх, хөнгөвчлөх зорилготой юм.
Робот нохой, дижитал хиймэл оюун ухаанаас эхлээд нисгэгчгүй дрон, усан доорх "5G" сүлжээ хүртэл Хятад улс инновацид тууштай хүчин зүтгэж буйгаа онцлон харууллаа. "DEEP Robotics" зэрэг компани дижитал зах зээлийн хязгаарыг шинэчилж, бүтээлч байдлыг дэлхийн хамтын ажиллагаагаар дамжуулан олон улсад таниулах зорилго тавьж байна.
Холбоотой мэдээ