Мөн Замын хөдөлгөөний дүрэм зөрчих, хурд хэтрүүлж байгаагаас гарах осол аваарын тоо буурахгүй байгаа талаар Тээврийн цагдаагийн албанаас анхааруулж байна. Тэр дундаа дүрэм мэдэхгүй жолоочид, жолоодох эрхийн үнэмлэхгүй бага насныхан замын хөдөлгөөнд оролцож байгаагаас эгнээ байраа буруу эзлэх, машинтай болон явган зорчигчийг мөргөж бусдын эд хөрөнгө, эрүүл мэндэд хохирол учруулах болжээ. Өсвөр насны хүүхдүүд суррон ихээр унаж байгаа нь нийслэлийн авто замын хөдөлгөөнд гарах ослын тоонд багагүй нөлөө үзүүлж байгаа аж.

Ямартай ч энэ жилээс олон нийтийн дунд маргаан дагуулаад байсан суррон, скүүтерийг хүүхдүүд унаж байгаад энэ жилээс албан ёсоор хяналт тавьж, зохицуулалт хийхээр болсон талаар Тээврийн цагдаагийн албанаас мэдээллээ.

Тодруулбал, скүүтерийг мопедын ангилалд оруулсан стандарт батлагдсан байна. Мөн иргэдийн шүүмжлэлтэй ханддаг цахилгаан хөдөлгүүрт сурроныг албан ёсоор мотоциклын ангилалд оруулж, хариуцлага, дүрэм журмыг мөрдүүлж ажиллахаар болжээ. Жолоодох эрхийн А үнэмлэхтэй байхаас гадна сурронтой замын хөдөлгөөнд оролцох иргэн заавал хамгаалах хэрэгсэлтэй байхыг албаныхан анхааруулж байна. Ийм иргэд та бүхэн тээврийн хэрэгслээр замын хөдөлгөөнд оролцохдоо дүрмээ баримтлахыг мөн зөвлөж байна.