"BTS" хамтлагийн шүтэн бишрэгчдэд зориулсан арга хэмжээний үеэр нэгэн япон эмэгтэй хамтлагийн гишүүн Жингийн хацар дээр үнссэн нь буруутаж, байцаалтад дуудагдсан. Тэгвэл тус эмэгтэйн мөрдөн байцаалтын ажиллагааг түр түдгэлзүүлснийг Өмнөд Солонгосын Сөүл хотын Сонгпа цагдаагийн газар өнөөдөр /2025.03.31/ мэдэгдлээ. Эмэгтэй мөрдөн байцаалтад өөрийн биеэр иртэл хэсэг хугацаа шаардагдах тул ийм шийдвэр гаргажээ.

Эл үйл явдал өнгөрсөн оны зургадугаар сарын 13-нд буюу түүнийг цэргээс халагдсаны маргааш болсон. 1000 шүтэн бишрэгч оролцсон үнэгүй тэврэлт гэх арга хэмжээний үеэр 50 гаруй насны япон эмэгтэй Жин буюу Ким Сок Жиний хацар дээр үнссэн аж.

Түүнийг олон нийтийн газар бусдад бэлгийн дарамт үзүүлсэн хэргээр байцаалтад дуудсан байна. Сэжигтэн хилийн чанадад хоёр сараас дээш хугацаагаар байгаа тохиолдолд мөрдөн байцаалтын ажиллагааг үргэлжлүүлэхэд хүндрэлтэй тул ажиллагааг түр зогсоох цагдаагийн журам байдаг. Сэжигтэн өөрийн биеэр ирмэгц мөрдөн байцаалтыг үргэлжлүүлэх аж.

"BTS" хамтлагийн хамгийн ахмад гишүүн Жин 18 сарын цэргийн алба хаагаад, өнгөрсөн оны зургадугаар сард халагдсан билээ. Халагдсанаасаа хойш тэр нийгэм олон нийтийн үйл ажиллагаанд идэвхтэй оролцохын зэрэгцээ уран бүтээлдээ ч эргэн орсон. Тухайлбал, Жин Парис 2024 зуны олимпийн бамбарын буухиад оролцсоноос гадна "Happy" нэрт анхны цомгоо арваннэгдүгээр сард гаргажээ.