Хүнс, хөдөө аж ахуй, хөнгөн үйлдвэрийн сайд Ж.Энхбаяр өнөөдөр /2025.03.31/ цаг үеийн асуудлаар мэдээлэл өглөө.

Тэрбээр "Төмс, хүнсний ногооны тариалалтад онцгой анхаарна. Жилдээ 65 мянган тонн импортын ногоо орж ирж байгаа ч хэмжээ нь тасралтгүй багасч байгаа. Төмс, хүнсний ногооны ургацын хэмжээ тасралтгүй өсч байна. Хамгийн өндөр үзүүлэлт хүнсний ногоон дээр гарч байна. Малын 6-8 төрлийн шинэ тэжээлийг өргөн хэмжээнд тарина. Өнгөрсөн жил 100 гаруй мянган га талбайд тэжээл тарьж, 270-аад мянган тонн ногоон тэжээл бэлтгэсэн. Энэ өвөл мал аж ахуйн салбарт бэрхшээл гарахгүй байгаа суурь нь тэжээлийн бааз нэмэгдсэнтэй холбоотой. Махны үнэ, экспорт гээд олон зүйл тогтвортой байгаа цааш шалтгаан нь тэжээлийн нөөцийг сайтар бүрдүүлсэнтэй холбоотой юм. Ийм зорилтуудыг хэрэгжүүлнэ. Ингэхийн тулд техникийн бэлэн байдал чухал. Шаардлагатай үр, бордооны асуудал чухал. Өнгөрсөн 10 хоногт хүнсний ногоо, жимс жимсгэнэ, үр тариа гээд салбар тус бүрээр техникийн зөвлөгөөнийг зохион байгуулсан.

Нэгдсэн зөвлөгөөнийг бас хийж, газар тариалангийн салбарыг мал аж ахуйтай төгс хослуулах, хөнгөн хүнсний үйлдвэрүүдээ дэмжих "Цагаан алт" болон "Хүнсний хувьсгал"-ыг дэмжих Атрын IV аяныг Ерөнхий сайд Л.Оюун-Эрдэнэ зарлалаа.

Мал аж ахуйн гаралтай түүхий эд хязгаарлагдмал нөөц буюу үнэтэй зах зээлд ордог. Монгол Улс дэлхийн ноолуурын зах зээлийн 50 хувийг дангаараа гаргана. Хонины тоо толгойгоор Монгол хамгийн олон хоньтой 14 дэх орон. Манай бүтээгдэхүүний суурь нөөц сайн. Бид энэ салбарт амжилттай өрсөлдөж, том тоглогч байх ёстой. Ноолуурын экспорт 404 сая ам.долларт хүрсэн. Дэлхийн зах зээлд 2.7 тэрбум ам.долларын бизнес явагдаж байна. Бид 404 сая ам.доллараа ойрын хугацаанд нэг тэрбум ам.доллар бүхий нэмүү өртөг шингэсэн бүтээгдэхүүн болгох боломжтой. Та бүхэн санаж байгаа бол ноолуураа  анх түүхийгээр нь гаргадаг байсан бол дараа нь 100 хувь угаах зорилт тавьсан. Жилдээ 25-30 саяд ямаан сүргийг өсгөж байна. Энэ нь 8500-10.000 тонн түүхий ноолуур жил бүр дэлхийн зах зээлд нийлүүлэх боломжтой. Түүхий ноолуураа угаахаар 7000 тонн ноолуурынхаа 80 хувийг экспортод хийж, 20 хувиар нь утас хийдэг байсан. Одоо бид 100 хувь ноолуураа самнах зорилт тавьж байгаа. Ингэхээр угаасан 7000 тонн ноолуур нь 5000 тонн цэвэр бүтээгдэхүүн гаргаж эхэлнэ. Самнасан ноолуур дэлхийн зах зээлийн гол бараа байдаг. Бид ноолуураа самнаж гаргахын тулд өнөөдрийн байдлаар 12 мянган тонн хүчин чадлыг суурилуулж дууслаа. Одоо бид ноолуураа угааж, самнаж чадаж байна. Энэ хооронд 250 сая ам.долларын нэмүү өртөг, ажлын байр, орлого Монголд үлдэж шат ахиж байна" гэсэн юм.