Бусдад эд зүйлээ дээрэмдүүлсэн гэх хэрэг сүүлийн саруудад нэмэгдэж байгааг цагдаагийн байгууллагаас мэдээллээ. Тодруулбал, гэр хороололд оройн цагаар гэрэлтүүлэггүй хэсэг, камергүй гудамжид бусдад эд зүйлээ дээрэмдүүлэх тохиолдол их гарч байгаа аж. Тиймээс иргэд та бүхнийг олон нийтийн газраар явахдаа аль болох гэрэлтэй, камертай хэсгээр явах,% эд зүйлээ хулгайд алдахаас сэрэмжлүүлж байна.

Цагдаагийн байгууллагаас өгч байгаа мэдээллээс ганцхан жишээ татахад есөн сартай жирэмсэн эмэгтэйг гудамжид дээрэмдэж, биед нь халдсан хэрэг гарчээ.

Хохирогчийн хэлж байгаагаар, хэд хоногийн өмнө 20:00 цагийн үед гэр рүүгээ орох гэж яваад хоёр эмэгтэйд дээрэмдүүлсэн. Гэртээ байсан хоёр хүүхэдтэйгээ видео дуудлага хийгээд утсаар ярьж явлаа. Тэгсэн гэнэт огт танихгүй хоёр согтуу эмэгтэй гарч ирээд гудамжид явж байхад минь үсдэж аваад учир зүггүй зодож, утас болон байсан эд зүйлийг минь аваад явсан. Би есөн сартай жирэмсэн учир удаан явж байсан. Урдаас хүн ирж явааг ч анзаараагүй. Яах аа мэдэхгүй уйлж сууснаа, ойрхон байдаг таньдаг эгчдээ очоод цагдаад дуудлага өгсөн. Цагдаа нар ирээд тэр хоёр эмэгтэйг барьсан. Тиймээс орой үдшийн цагаар хүүхдүүд, эмэгтэйчүүд анхаарал болгоомжтой яваарай гэж сануулмаар байна гэв.

ЦЕГ-аас тус хэргийг шалгаж байгаа бөгөөд бусдын биед халдаж, эд зүйлийг дээрэмдсэн этгээдүүдийг саатуулан шалгаж байгаа гэлээ.

Энэ төрлийн гэмт хэрэг үйлдэгчид бага насны хүүхэд, жирэмсэн эмэгтэйчүүд, хөгжлийн бэрхшээлтэй иргэд болон согтууруулах ундаа хэтрүүлэн хэрэглэж биеэ хянах чадваргүй болсон иргэдийн эмзэг байдлыг ашиглан эд зүйлийг нь хүч хэрэглэж авч байгааг мөн Цагдаагийн байгууллагаас анхаарууллаа.