Авлигын хэргээр баривчлагдсан Истанбул хотын даргыг суллахыг шаардсан жагсаал үргэлжилж байна. Жагсагчид Туркийн гол сөрөг хүчин Бүгд Найрамдах Ардын Нам буюу "CHP"-ны уриалгын дагуу Бямба гаригт Истанбул хотын төв талбайд цугларсан байна. Хотын дарга Экрем Имамоглу гуравдугаар сарын 19-нд баривчлагдаж, дараа нь хоригджээ. Тэрбээр өөрийг нь авлигын хэргээр гүтгэж буйг буруутгаж байгаа юм. Улмаар Имамоглу баривчлагдсаныхаа дараа 2028 онд болох ерөнхийлөгчийн сонгуульд нэр дэвших болсноо мэдэгдсэн байна.

Жагсаал дээр сөрөг хүчний  дарга Озгур Озел үг хэлэхдээ, ерөнхийлөгч Режеп Тайип Эрдоганы засаг захиргааг шүүмжилж, хотын даргыг баривчилсан явдлыг “бидний хүсэл зоригийн эсрэг хийсэн төрийн эргэлт” гэж нэрлэжээ.Мөн түүний нам нь Имамоглыг суллагдтал тэмцлээ үргэлжлүүлэхээр шийдээд байна.

Сүүлийн үеийн жагсаалыг Эрдоган "гудамжны терроризм" гэж буруутгаж буй. Туркийн эрх баригчид одоогийн байдлаар 1900 орчим жагсагчийг саатуулаад байна. Түүнчлэн, тус улсын хууль зүйн сайд Йылмаз Тунч авлигын хэрэгт холбогдсон хэргийн мөрдөн байцаалтын ажиллагаа нь хуульд үндэслэсэн учир зүй ёсны хэрэг гэж Имамоглуг хорьж буйг зөвтгөсөн байна. Тэрбээр мөн сөрөг хүчний намыг шүүмжилж, зарим гишүүд мөрдөн байцаалтын явцад ямар ч мэдээлэлгүй байж шүүхийн байгууллагад дарамт шахалт үзүүлэхийг оролдсон гэж мэдэгдэв.