Хятад болон Хонконгийн засаг захиргааны онцгой бүсийн засгийн газраас газар хөдлөлтөд нэрвэгдсэн Мьянмарын бүс нутгуудад эрэн хайх, аврах ажиллагаанд туслахаар 88 хүний ​​бүрэлдэхүүнтэй эрэн хайх, аврах багийг Бямба гаригт илгээсэн байна. Тус бүрэлдэхүүнд Аюулгүй байдлын товчоо, Гал түймэртэй тэмцэх газар, Цагаачлалын алба, Эмнэлгийн ажилтнууд багтжээ. Мөн эрэлч нохдыг авчирсан байна.
Хонгконгийн дарга Жон Ли олон улсын нисэх онгоцны буудал дээр аврах багийг угтан авч, багийн төлөөлөгчдөд “HKSAR”-ын тугийг гардуулан өгч амжилт хүсчээ. Хонконг дахь Мьянмарын Ерөнхий консулын газраас аврах, эрэн хайх ажиллагаанд тусламж үзүүлэх хүсэлт гаргасны үндсэн дээр аврах баг илгээж байгаа юм. Ли, аврах багийн гишүүдэд түргэн шуурхай ажиллаж, богино хугацаанд иж бүрэн бэлтгэл хийсэнд талархал илэрхийлсэн бөгөөд бүс нутаг, засаг захиргааны зүгээс тус багт бүх талын дэмжлэг үзүүлж, үүрэг даалгаврыг нь аюулгүй, саадгүй дуусгахад нь анхаарах болно гэж онцлон тэмдэглэсэн байна.

Мьянмарын нийслэл Ней Пи Тау хотод Баасан гаригт болсон 7.7 баллын хүчтэй газар хөдлөлтийн дараа Хятадын Юньнан мужийн аврах эмнэлгийн баг нурангинаас хоёр хүнийг эсэн мэнд олжээ. Хятадын аврах багийнхан Ней Пи Тау хотод хүрэлцэн ирсэн даруй Мьянмарын орон нутгийн гал сөнөөгчидтэй нэгдэж, амьд үлдсэн хүмүүсийг эрэн хайх ажиллагааг эхлүүлсэн аж. Учир нь газар хөдлөлтийн улмаас гурван давхар эмнэлэгт их хэмжээний хохирол учирч, нэг давхар нь бүрэн нурж, өвчтөнүүд нуранги дор дарагдсан байжээ. Орон нутгийн гал сөнөөгчдийн мэдээлснээр, ажлын цагаар газар хөдлөлт болсон тул хотод амиа алдагсдын ихэнх нь өндөр настан, хүүхдүүд байжээ.

Мьянмарын төвд болсон газар хөдлөлтийн улмаас нас барагсдын тоо 1644 болж, 3408 хүн бэртэж гэмтсэн гэх албан тоог тус улсын арми мэдэгдэв.

Эх сурвалж: China daily