Хаврын тоос, шорооноос сэргийлэх зорилгоор хотын Захирагчийн ажлын албанаас хаврын их цэвэрлэгээг жил бүр зохион байгуулдаг уламжлалтай. Гэхдээ угтаа бол хотын захиргаанаас уриалга гаргаагүй байсан ч хотын иргэд, аж ахуй нэгжүүд дор бүрнээ хариуцлагатайн дээр ухамсартай байх нь зүйтэй юм. Товчхондоо бол нийслэлээ тордож, өнгөлж сар тутамд нийтийн их цэвэрлэгээг уриалан хийдэг ч иргэдийн хандлага өөрчлөгдөөгүй цагт их хөлийн газар соёл тогтохгүй гэдэг. Энэ нь  ч үнэний ортой бололтой.

Хотынхон соёлтой иргэн байх уриалга дэвшүүлж, хоггүй Улаанбаатарт амьдрах агуулгыг сурталчилгааны самбаруудад байршуулдаг ч амжилт олдоггүй.

Зөрчлийн тухай хуулиар нийтийн зам талбайд нус, цэр, шүлс тэр бүү хэл тамхины иш хаявал торгох заалттай. Харамсалтай нь, энэ заалт цаасан дээр бичигдсэн төдий зүйл. Тиймдээ ч нийтийн эзэмшлийн талбай, гудамжны булан, ТҮЦ-ийн эргэн тойронд нус, шүлс байсаар. Мөн орон сууцны хотхон, гудамжны буланд ил задгай хаясан хог өнөөг хүртэл нийслэлийнхний толгойг гашилгаж буй.

Асуудлын гаргалгаа нь угтаа бол иргэдийн ухамсарт бий.

Их цэвэрлэгээг тусгайлан зарлаж төрийнхөн, хувийн хэвшлийнхнээр ялгарч хогоо цэвэрлэхээс илүүтэй иргэд өөрөөсөө эхэлж соёлтой байх нь чухал болов. Эцсийн дүндээ хог хаягдал, ялгадас хүний эрүүл мэнд, агаар, хөрс, орчны бохирдлыг бий болгодог. Тэгэхээр хүн байгалиа төдийгүй өөрийгөө, үр хүүхдээ хордуулсаар байна. Тиймээс иргэд, аж ахуй нэгжүүд нийтийн их цэвэрлэгээндээ нэгдэж, нийслэлээ өнгөлж, цэмцгэр гудамж, талбайгаар зорчихыг бусдадаа уриалах биш үлгэрлэхлэх нь зүйтэй.