Нийслэлийн Багануур дүүрэгт шалтгаан тодорхойгүй хордлогод зургаан хүн өртөж, хоёр хүн нас барсан байна. Тархвар судлалын асуумжаар метилийн спирт уусан байж болзошгүй бөгөөд өртсөн дөрвөн хүнээс нэг хүн Багануур дүүргийн Эрүүл мэндийн төвийн сэхээнд, гурван хүн эмнэлэгт хэвтэн эмчлэгдэж байгаа аж.

Энэ талаар цагдаагийн байгууллагаас тодруулахад, хордлогын шинжтэй хоёр хүн эмнэлэгт хүргэгдэж очоод нэг нь нас барсан.

Цагдаагийн байгууллагад өнгөрсөн Баасан гаригт /2025.03.28/ 13.00 цагийн орчимд Багануур дүүргийн нэгдүгээр хороо Эрүүл мэндийн төвд хордлогонд орсон байж болзошгүй хоёр хүн ирээд нэг нь нас барсан гэх дуудлага мэдээлэл бүртгэгдсэн. Одоогийн байдлаар нэн иргэн эмнэлэгт нас барсан. Харин нөгөө иргэн нь тусламж авч эмнэлэгийн байгууллагын хяналтад байна гэлээ. 

Шалгалтаар иргэний нас барсан шалтгаан, хордлогын нөлөөлөл байгаа эсэх, бусад нотловол зохих байдлыг тогтоохоор шалгалтыг үргэлжлүүлж байгаа аж.

Нийгмийн эрүүл мэндийн үндэсний төв, Багануур дүүрэг хамтран эрсдэлийн үнэлгээ хийхэд дунд зэргийн эрсдэлтэй гарсан. Нийслэлийн Эрүүл мэндийн хяналтын газраас таван хүний бүрэлдэхүүнтэй баг мөн ажиллаж байна.

Иймд иргэд олон нийтийг архи тамхи зэрэг хорт зуршлуудаас зайлсхийхийг анхааруулж байна. Учир нь архи, спиртэд хордож нас барсан тохиолдол сүүлийн жилүүдэд нэмэгдсэн буюу 2020 онд 650 тохиодол байсан бол 2022 онд 1071 болж нэмэгджээ.