"Microsoft"-ын үүсгэн байгуулагч, тэрбумтан Билл Гейтс ирэх 10 жилийн хугацаанд олон салбарт хүний хэрэгцээ үгүй болж, тэднийг хиймэл оюун ухаан орлоно гэлээ. Тэрбээр "NBC"-д ярилцлага өгөхдөө "Одоогийн байдлаар эмч, багш зэрэг бидний итгэж найддаг мэргэжилтнүүд ховор байгаа ч хиймэл оюун ухааны хүчээр 10 жилийн дараа гэхэд энэ нь үнэ төлбөргүй, энгийн зүйл болох болно. Эрүүл мэндийн гайхалтай зөвлөгөө, сургалт гэх мэт" гэв.

Гэхдээ бүх ажлын байрыг хиймэл оюун ухаан орлож дөнгөхгүй. Жишээлбэл, хүмүүс бейсбол тоглож буй робот харахыг хүсэхгүй нь лавтай гэдгийг Гейтс хэлсэн юм.

Энэ санаагаа Билл Гейтс өнгөрсөн сард ч мөн ярилцлага өгөх үеэрээ хэлсэн билээ. Түүний хэлснээр дэлхий ертөнц чөлөөт оюун ухаан гэх шинэ эрин үе рүү орж байна. Шинэ эрин үед сайжруулсан эм, оношилгоо, хиймэл оюун ухаант багш, виртуал туслах зэргээр технологийн дэвшил хурдацтай явагдах болно.

"Энэ бол маш гүнзгий утга агуулгатай, гэсэн атлаа бага зэрэг аймшигтай зүйл. Бүх зүйл маш хурдан өрнөж байна. Энд дээд хязгаар гэж байхгүй" гэж тэр хэлжээ.

Хиймэл оюун ухаант ирээдүйн талаар хүмүүс янз бүрээр таамаглаж байна. Хиймэл оюун ухаанаар хүнийг бүрэн орлуулалгүй харин илүү үр дүнтэй ажиллахад нь тусалж, эдийн засгийн өсөлтийг өдөөж, илүү олон ажлын байр бий болгох боломжтой гэж үзэх хүмүүс ч бий.

Билл Гейтсийн хувьд хиймэл оюун ухаант ирээдүйг илүү өөдрөгөөр харж байгаагаа өнгөрсөн жил илэрхийлж байжээ. Үхлийн аюултай өвчнийг эмчлэх шинэлэг арга, уур амьсгалын өөрчлөлтийн шинэлэг шийдэл, хүн бүрт зориулсан өндөр чанартай боловсрол гэх мэт нь хиймэл оюун ухааны хүн төрөлхтөнд үзүүлэх ашиг тус юм.