Цэргийн арслан Г.Жамбалдорж залуу бөхчүүдэд зөвлөв

Цэргийн арслан Г.Жамбалдорж сумын цолтой болон залуу бөхчүүдийн барилдааны үеэр өөрийн алдаандаа дүгнэлт хийж, залгамж халаа болсон залуу бөхчүүдэд допингоос хол байхыг зөвлөжээ.

Тэрбээр "Допингийн асуудал дээр хэн нэгэнд буруу өгөх биш бэртэл гэмтлээ мэргэжлийн эмчийн заавар дор эдгээх ёстой юм байна.

Хэн нэгний шахалт шаардлагаар ч юм уу, мэдэхгүй зүйлийг чинь "Энийг хэрэглэж байж л сайн барилдана. Тэр аварга, арслан энэ юмыг хийлгэж байж л сайн барилдсан" гэх мэт үгэнд орж, өөрсдийгөө битгий эрсдэлтэй байдалд оруулаарай" гэдгийг хэлж, захижээ.

Өнгөрсөн жилийн Улсын баяр наадамд дөрөв давсан бөхчүүд, манлайлсан сур харваачид гээд нийт 48 хүнээс допингийн сорьц авч, гурваас нь допингийн төрлийн хориотой эм бэлдмэл илэрсэн нь нотлогдсон талаар мэдээлж байв. Тэдний нэг нь цэргийн арслан Г.Жамбалдорж бөгөөд өөрийн цахим хуудсаараа дамжуулан допингийн шинжилгээнд бүдэрсэн гэдгээ мэдэгдэж, ард түмнээсээ уучлалт гуйсан юм.