ОХУ-ын ерөнхийлөгч Путин Украинд шинэ сонгууль явуулж, дайныг зохицуулах гол хэлэлцээнд гарын үсэг зуруулахын тулд түр засаглалын хэлбэрт оруулах санал тавьжээ.

Путин Мурманскт болсон форумын үеэр үг хэлэхдээ “Оростой харилцаагаа сайжруулсан Трамп өдгөө гурван жил үргэлжилсэн дайныг зогсоохыг чин сэтгэлээсээ хүсч байгаа. ОХУ ч бас мөргөлдөөнийг зогсоох зорилгодоо хүрэхийн тулд тогтмол урагшилж байна. Зарчмын хувьд НҮБ, АНУ, Европын орнууд болон бусад түншийн ивээл дор Украинд түр засаг захиргааг нэвтрүүлж болох нь мэдээж. Ардчилсан сонгууль явуулж, ард түмний итгэлийг хүлээсэн чадварлаг засгийн газрыг засгийн эрхэнд гаргаснаар тэдэнтэй энхийн гэрээ байгуулахад дөхөм болох юм” гэжээ.

Украины ерөнхийлөгч Зеленскийн бүрэн эрхийн хугацаа 2024 оны тавдугаар сард дуусах байсан ч дайны цагийн хуулийн дагуу сонгууль зохион байгуулаагүй. Иймд Путин түр засаглал гэдэг үгээрээ Зеленскийн байр суурийг онцолсон гэж үзэж байна. Харин Зеленский үүнийг үгүйсгэж, дайн байлдаантай нөхцөлд сонгууль явуулах ямар ч боломжгүй гэж мэдэгджээ.

Мөн “Трампийн ОХУ-тай шууд яриа хэлэлцээ хийх эрмэлзлийг харвал тэр өмнөх ерөнхийлөгч Жо Байденаас илүүтэйгээр энх тайвныг хүсч байна” гэж Путин хэлжээ.

ОХУ дайныг зогсоохын тулд Хойд Солонгос зэрэг бусад оронтой хамтран ажиллахад бэлэн гэдгийг мөн Путин хэлжээ. Хойд Солонгосоос Украинд өнгөрсөн онд 11 мянга гаруй цэрэг илгээсэн гэх мэдээлэл бий. Түүнчлэн энэ он гарсаар дахин 3000 цэрэг Украинд байршуулсан байх магадлалтайг Өмнөд Солонгос мэдээлсэн.