Францын ерөнхийлөгч Эммануэль Макроны зохион байгуулсан Украины асуудлыг хэлэлцэх дээд хэмжээний уулзалт Пүрэв гаригт Парис хотод боллоо. Украины ерөнхийлөгч Зеленский болон НАТО, Европын холбооны 30 шахам улс орны удирдагч нар оролцсон уулзалтын дараа Эммануэль Макрон “Франц, Их Британи улсууд ойрын хугацаанд Украинд хамтарсан багаа илгээж, цэргээ байршуулах төлөвлөгөөг гаргана” гэж мэдэгдэв.

Энэ нь гал зогсоох хэлэлцээ хэрэгжсэний дараа энхийг сахиулах зорилгоор цэргийн хүч илгээх санал юм. “Цэргийн хүчийг фронтын шугамд биш, харин хамгаалалтын хоёрдугаар шугамд стратегийн нөөц болгон байрлуулж, Оросын аливаа шинэ түрэмгийллийг таслан зогсооход туслах болно” гэж Макрон хэлжээ.

Мөн уулзалтад оролцогчид Оросын эсрэг авсан хориг арга хэмжээг цуцлах цаг нь болоогүй гэдэгтэй санал нэгдсэн байна. Цагаан ордон Орос, Украинтай аюулгүй навигацыг баталгаажуулж, Хар тэнгист хүч хэрэглэхийг зогсоохоор тохиролцсон тухайгаа өнгөрсөн Мягмар гаригт мэдэгдсэн билээ. Харин ОХУ Хар тэнгисийн аюулгүй байдлын асуудлаар АНУ-тай хийсэн тохиролцоо хүчин төгөлдөр болохын тулд зарим хориг арга хэмжээг цуцлах ёстой гэж үзэж байна.