Б.Мөнхнар тэргүүтэй тамирчид Ази тивээс хүрэл медаль хүртлээ

Йордан улсын Амман хотод чөлөөт бөхийн насанд хүрэгчдийн Ази тивийн аварга шалгаруулах тэмцээн өчигдөр /2025.03.27/ эхэлж, эмэгтэйчүүдийн таван жингийн медальтнууд тодорлоо. Тодруулбал, Монгол Улсын багаас дөрвөн бөх хүрэл медалийн төлөө барилдсан ба гурав нь медалийн тавцанд гарч, нэг нь шагналт тавдугаар байрт шалгарсан амжилт үзүүллээ.

Тухайлбал, тэмцээний 50 кг-ын жинд Б.Мөнхнар, 55 кг-д Б.Отгонтуяа, 68 кг-д Э.Дэлгэрмаа нар хүрэл медаль хүртсэн юм.

Тэмцээний эхний өдөр эмэгтэйчүүдийн 50 кг-ын жинд Б.Мөнхнар хүрэл медаль хүртэж, тус тэмцээний Монголын багийн медалийн салхийг хагаллаа. Тэрбээр хүрэл медалийн төлөөх барилдаанд залуучуудын ДАШТ-ий мөнгөн медальт Казахстаны бөх Светлана Анкичеваг 3:0-ээр ялснаар Ази тивийн анхны медалиа гардаж байна.

Харин Э.Дэлгэрмаагийн хувьд Ази тивийн дөрөв дэх медалиа хүртсэн бол Б.Отгонтуяа Ази тивийн анхны медалиа гардсан нь энэ юм. Ази тивийн аварга шалгаруулах тэмцээн гуравдугаар сарын 31-нийг дуустал үргэлжлэх бөгөөд нийт 378 тамирчин өрсөлдөж буй.

Монгол Улсаас чөлөөт бөхийн төрөлд Үндэсний шигшээ багийн эрэгтэйчүүдийн багийн ахлах дасгалжуулагч Д.Гомбодорж, дасгалжуулагч Ж.Чулуунбат, Г.Амархүү, эмэгтэйчүүдийн багийн ахлах дасгалжуулагч С.Сүхбаатар, дасгалжуулагч Б.Одончимэг, Ө.Ууганбаяр нарын удирдлага дор нийт 20 тамирчин оролцох бол сонгомол бөхийн төрөлд дасгалжуулагч С.Мөнхсүхийн удирдлага дор гурван тамирчин зодоглоно.

Ази тивийн аварга шалгаруулах тэмцээнд чөлөөт бөхийн УАШТ-нд түрүүлсэн тамирчид өрсөлддөг уламжлалтай. Монголчууд анх 1989 онд Ази тивийн аварга шалгаруулах чөлөөт бөхийн тэмцээнээс медаль хүртэж байжээ. Тодруулбал, Япон улсад болсон тус тэмцээнээс 48 кг-ын жинд Ч.Батбадрал, 68 кг-д Х.Амараа, 82 кг-д П.Сүхбат нар алтан медаль хүртсэн бол 130 кг-д А.Баатархүү мөнгө, 74 кг-д Л.Энхбаяр, 90 кг-д Ч.Бямбадорж нар хүрэл медальтай ирж байв. Монголын чөлөөт бөхийн баг 1979 оноос эхлэн тус тэмцээнд тасралтгүй оролцохдоо 1999 оноос бусад жилүүдэд медальтай ирсэн байдаг.