Дональд Трамп ерөнхийлөгчөөр сонгогдсоныхоо дараа Гренланд арлыг АНУ-ын бүрэлдэхүүнд нэгтгэх тухай мэдэгдсэн билээ. АНУ-ын дэд ерөнхийлөгч Ж.Д.Вэнс, түүний гэргий хатагтай Уша Вэнс, Эрчим хүчний сайд Крис Райт нар арлын баруун хойд хэсэгт орших Питуффик цэргийн сансрын баазад зочлохоор төлөвлөөд буй. Тэгвэл энэ айлчлалын өмнө Трамп санаагаа дахин давтаж, "АНУ Гренландад хяналтаа тогтоохын тулд хөлөө хүрэх газар хүртэл явна" гэв.

Энэ асуудал дээр ОХУ-ын ерөнхийлөгч Путин Трампийг дэмжсэн байр суурь илэрхийллээ. Мурманск хотод болсон Арктикийн форумд үг хэлэхдээ Путин бүс нутагт Оросын манлайллыг бэхжүүлэх амлалт өгөхийн зэрэгцээ геополитикийн өрсөлдөөн ширүүсч байгааг анхааруулав. Тэрбээр Гренландыг авна гэсэн Трампийн санааг жишээ татсан боловч түүнийг шүүмжилсэн үг хэлээгүй. Энэ нь Цагаан ордон, Кремль хоёр харилцаагаа сэргээхийг хичээж буйн илрэл гэж үзэв.

Тэрбээр "АНУ-ын Гренландтай холбоотой төлөвлөгөө бол нухацтай авч үзэх сэдэв. Энэ төлөвлөгөө нь түүхэн үндэслэлтэй. АНУ Арктикт геостратегийн, цэрэг-улс төр, эдийн засгийн ашиг сонирхлоо цаашид системтэйгээр хэрэгжүүлэх нь тодорхой. Энэ бол хоёр тодорхой улсын асуудал. Бидэнд ямар ч хамаагүй" гэжээ.

Жо Байдены үеэс хойш юм бүхэн өөрчлөгдөж буй нь Арктикийн бүс нутаг дахь АНУ, Оросын хамтын ажиллагааны эрмэлзлээс харагдана.

Өнөөдөр ОХУ байгалийн баялгаар дүүрэн Арктикийн бүс нутагт АНУ-тай эдийн засгийн хамтын ажиллагааг хөгжүүлэхээр зорьж байна. Тодруулбал, Кремлийн гадаад хөрөнгө оруулалт, эдийн засгийн хамтын ажиллагаа хариуцсан төлөөлөгч Кирилл Дмитриев “Бид ОХУ-ын засгийн газраас баталсан тодорхой салбарт АНУ-тай хамтран хийж болох хөрөнгө оруулалтын янз бүрийн боломжуудыг авч үзэхэд нээлттэй. Энэ нь ложистик эсвэл Орос, АНУ-д ашигтай бусад салбар байж болно. Гэхдээ хэлэлцээрээс өмнө Украин дахь дайныг зогсоох хэрэгтэй гэж би санал болгомоор байна” гэж мэдэгдсэн юм.