Булган аймгийн ИТХ-ын төлөөлөгч, тэргүүлэгчээр ажиллаж байсан “Хангай констракшн” компанийн удирдах албан тушаалтан С.Гал-Эрдэнэд /2025.02.10/ анхан шатны шүүхээс хахууль өгсөн гэм буруутайд тооцон хоёр жилийн хорих ял оноосон. Гэвч тэрбээр анхан шатны шүүхийн шийдвэрийг эс зөвшөөрч, давж заалдах шатны шүүхэд хандсан юм.

Тэгвэл С.Гал-Эрдэнэ нарт холбогдох хэргийн давж заалдах шатны шүүх хурал өчигдөр /2025.03.27/ Нийслэлийн Эрүүгийн хэргийн Давж заалдах шатны шүүхэд болж, шүүхээс С.Гал-Эрдэнэд хоёр жилийн хорих ял оноосон анхан шатны шүүхийн шийтгэх тогтоолыг хүчингүй болгож шийдвэрлэсэн байна.

Хэргийг эргэн сануулахад, 2023 оны аравдугаар сарын 13-нд Булган аймгийн ИТХ-ын төлөөлөгч С.Гал-Эрдэнэ цагдаагийн ажилтанд авлига өгсөн гэх хэргээрээ АТГ-т шалгагдаж байгаа тухай мэдээлэл цацагдсан. Тэрбээр, 2023 оны долдугаар сард гэр бүлийн хүчирхийлэл үйлдэж, Хан-Уул дүүргийн цагдаагийн 2-р хэлтэст шалгагдаж байхдаа алба хаагчийн хамаарал бүхий хүний данс руу мөнгө шилжүүлж хэргээ хаалгуулахаар хандсан болох нь тогтоогдсон юм.