Элон Маскийн Ангараг руу хөөргөхөөр төлөвлөж буй жижиг атомын цахилгаан станцыг ОХУ нийлүүлж магадгүй гэж Владимир Путины Олон улсын хамтын ажиллагааны элч Кирилл Дмитриев Пүрэв гаригт мэдэгдэв. Тэрбээр “Москва энэ талаар Масктай видео хурлаар хэлэлцэж болно” гэжээ. Дмитриев энэ сард Масктай хамтран ажиллах боломжийн талаар хоёр дахь удаагаа ярьж буй нь энэ юм.

Украин дахь дайны улмаас АНУ, Оросын харилцаа сүүлийн хэдэн арван жилд байгаагүй хамгийн доод түвшиндээ хүрээд байв. Харилцааг эргэн сэргээх зорилготой хэлэлцээний дараа Трамп дээрх саналыг гаргажээ. Оросын эсрэг авсан АНУ-ын хориг арга хэмжээ хэвээр байгаа ч Москва Вашингтонтой эдийн засгийн хамтын ажиллагаагаа хөгжүүлэхийг эрмэлзэж байна.

Трампийн ойрын хамтрагч Маск“Starship”-ийн туршилтууд бүтэлгүйтсэн ч ирэх оны эцэс гэхэд Ангараг руу хөөрнө гэж энэ сарын эхээр мэдэгджээ. Харин Ангараг гаригт хүн хөл тавих хугацааг 2029 оны эхээр гэж таамаглаж байна. Эс бол 2031 онд байж магадгүй гэжээ. Түүний төлөвлөж буй хотыг Ангараг дээр барьж байгуулахын тулд эрчим хүчний эх үүсвэр хэрэгтэй болно.

Гадаадын хөрөнгө оруулагчдыг татах чиглэлээр ажилладаг сангийн тэргүүн Дмитриев Мурманск хотноо Арктикийн форумын үеэр “Орос улс Ангараг гаригийн төсөлд асар их хувь нэмэр оруулж чадна. Бид Ангараг гаригт аялах жижиг оврын атомын цахилгаан станц болон бусад дэвшилтэт технологийн хүчин чадлыг санал болгож болно. Учир нь манайд хэрэгжих боломжтой цөмийн технологи байгаа" гэжээ.

Мөн тэрбээр Маскийг агуу алсын хараатай гэж магтсан байна.

Дашрамд дурдахад, ОХУ-ын “Роскосмос” сансрын агентлагийн дарга асан Юрий Борисов өнгөрсөн жил Орос, Хятад хоёр 2033-2035 онд саран дээр атомын цахилгаан станц байрлуулахаар хэлэлцэж байгаа гэж мэдэгдсэн билээ. Дайн эхэлсний дараа Европын сансрын агентлаг ОХУ-тай хамтарсан төслөө түр зогсоосон бөгөөд Москва 2022 онд Ангараг руу бие даасан нислэг үйлдэж эхэлнэ гэж мэдэгджээ.