"Цалинтай ээж" хөтөлбөрийн мөнгөн тэтгэмжийг 500 мянган төгрөг болгох асуудлаар ГБХНХЯ-ны сайд Л.Энх-Амгалан мэдээлэл өглөө.

Тэрбээр "Бид халамжийн тухай хуулийг удахгүй УИХ-д өргөн барина. Яагаад гэвэл халамжийн хуулиар олгож байгаа бүх хөтөлбөрүүдээ эргэж харах хэрэгцээ шаардлага байна. Хүүхдийн мөнгө ч бас халамжийн хуулиар олгогдож байгаа шүү дээ. Жил бүр улсын төсвөөс халамжид 2.4 их наядыг зарцуулж байна гэж ярьдаг. Гэтэл үүний 1.7 их наяд төгрөг нь дангаараа хүүхдийн мөнгөнд зарцуулагддаг. Тэгэхээр халамжид зарцуулж байгаа мөнгө дангаараа 600-700 тэрбум төгрөг байгаа юм. Цаашид бид халамжийн мөнгө олгох зорилтот бүлгийг тодорхой болгоё гэдэг дээр ажиллаж байна.

"Цалинтай ээж"-ийн мөнгийг би халамж гэж харахгүй байна. Энэ бол хүн амаа өсгөх бодлогын хүрээнд явах ёстой зүйл.

Хүүхдийн мөнгө ч гэсэн адилхан. Тэгэхээр бидэнд байгаа хувилбар бол нэгэнт төсвийн орон зай бага байгаа учраас магадгүй энэ мөнгийг гурван жил сар тутам 50 мянгаар авах уу, эсвэл хүүхдийг 0-6 сартай байх хугацаанд 100-150 мянган төгрөгөөр өгөх үү гэдэг тооцоолол дээр ярих хэрэгтэй. Тэрнээс биш сэтгэлийн хөөрлөөр "Цалинтай ээж"-ийн мөнгийг сарын 500 мянган төгрөг болгоно гэж тооцоололгүй ярьж болохгүй.

Би Д.Үүрийнтуяа гишүүнийг тийм үндэслэлгүй мэдээлэл хийгээгүй гэж ойлгож байгаа. Яагаад гэвэл өөрөө доктор, эдийн засагч байсан хүн. Ер цаашдаа "Цалинтай ээж" гэдэг нэрээрээ энэ хөтөлбөр хэрэгжих юм бол хөдөлмөрийн хөлсний доод хэмжээтэй уялдсан байх ёстой болов уу гэсэн санал, санаачилга гаргасан юм байна гэж ойлгосон" гэлээ.