Монголын үндэсний допингийн эсрэг байгууллагаас өчигдөр /2025.03.26/ Дархан аварга Н.Батсуурь тэргүүтэй 8-9 тамирчнаас төлөвлөгөөт явцын шинжилгээ авчээ. Тодруулбал, Дархан аварга Н.Батсуурь, аварга О.Хангай, улсын арслан Б.Орхонбаяр нарын тамирчдаас допингийн шинжилгээг шээс болон цусаар авсан бөгөөд усан сэлэлт, хөнгөн атлетик, буудлага, байт харваа, хүндийн өргөлтийн тамирчдыг хамруулсан гэдгийг албаныхан мэдээллээ. Шинжилгээний хариу нь ирэх долоо хоногт гарч, тамирчдын нэрсийг олон нийтэд зарлах гэнэ.

Монголын үндэсний допингийн эсрэг байгууллагаас өнөөдрийн байдлаар үндэсний бөхийн 104 тамирчнаас допингийн шинжилгээ авчээ.

Энэ тухай өмнө нь МҮДЭБ-ын Гадаад харилцааны албаны дарга  С.Зүчи мэдээлэл өгөхдөө "Энэ онд Монголын Үндэсний допингийн эсрэг байгууллагын санаачлагаар үндэсний бөхийн тамирчдаас нийт 150 шинжилгээ авахаар төлөвлөөд ажиллаж байна. Сорьцыг авсан өдрөө DHL буухиа шуудангаар Герман улсын Дрезден хотын лаборатори руу явуулж байгаа бөгөөд хариу дунджаар 14-21 хоногт ирж байгаа. Хариуг ирсэн дариуд нь тухайн тамирчдын шууд электрон хэлбэрээр танилцуулна.

Мөн МҮБХ тэмцээний үеийн 40 орчим шээс болон цусны шинжилгээг цагаан сарын барилдаанд болон энэ оны дөрөвдүгээр улирлын барилдаануудад авахаар төлөвлөсөн.

Харин Үндэсний их баяр наадам зохион байгуулах хороо улсын их баяр наадмаар 32 шинжилгээ, аймгийн чанартай наадмууд буюу 21 аймаг дээр нэмээд Багануур, Багахангай, Налайхын наадамд нийт 96 шинжилгээ авна. Үүний хажуугаар допингийн эсрэг сургалт хийхээр төлөвлөсөн" гэдгийг хэлж байсан юм.