Беларусийн удирдагч Александр Лукашенко энэ оны нэгдүгээр сард болсон ерөнхийлөгчийн сонгуульд дахин ялалт байгуулж, долоо дахь удаагаа эрх мэдлээ баталгаажуулсан. Энэ сонгуулийг өрсөлдөгчгүй сонгууль, төөрөгдөл гэх мэтээр олон нийт шүүмжилж буй. Саналын хуудсанд дөрвөн өрсөлдөгчийн нэр бичигдсэн ч бодит байдал дээр иргэд Лукашенкогоос бусад нэр дэвшигчийг бараг таних ч үгүй байжээ.

Тэрбээр Мягмар гаригт албан ёсоор тангаргаа өргөлөө. Өөрийг нь Европын сүүлчийн дарангуйлагч гэж нэрлэдэг хүмүүст хандан тэрбээр "Манай улс өөрсдийгөө ардчиллын үлгэр жишээ гэж нэрлэгсдээс хавьгүй илүү ардчилалтай. Жинхэнэ бизнес, иргэдийнхээ хүсэл сонирхлыг нэгдүгээрт тавьдаг манайх шиг ийм ‘дарангуйллыг’ дэлхийн тэн хагас нь мөрөөдөж байгаа. Олон нийтийн дэмжлэг байхгүй бол та нарт ирээдүй байхгүй" гэжээ.

Мягмар гаригт Лукашенког тангараг өргөхтэй зэрэгцээд гадаадад амьдарч буй сөрөг хүчний олон зуун дэмжигч жагсаал зохион байгуулжээ. Энэ нь 1918 онд Оросын эзэнт гүрэн задран унасны дараа Беларусь богино хугацаанд тусгаар тогтносоны ойн өдөр байв.

Беларусийн идэвхтнүүдийн мэдээлснээр тус улсад 1200 гаруй улс төрийн хоригдол байгаа бөгөөд тэдний дотор Нобелийн энх тайвны шагналт "Виасна" хүний ​​эрхийн төвийн үүсгэн байгуулагч Алес Беляцки багтдаг. "Виасна" болон Беларусийн хүний ​​эрхийн бусад 10 бүлгээс Мягмар гаригт мэдэгдэл гаргахдаа "Сонгууль хүний ​​эрхийн гүн хямралын дунд, хэлмэгдүүлэлтээс үүдэлтэй айдас түгшүүртэй орчинд явагдсан" гэжээ.