3×3 сагсан бөмбөгийн Азийн аварга өчигдөр/2025.03.26/ Сингапурт эхэлсэн. Тэмцээн урьдчилсан шатны тоглолтуудаар эхэлсэн бөгөөд өнөөдөр, маргааш үргэлжилж, гуравдугаар сарын 29-ний өдөр үндсэн шат эхлэх учиртай. Монголын эрэгтэй, эмэгтэй шигшээ багууд чансаагаараа тивээ тэргүүлж байгаа учир шууд үндсэн шатнаас тоглолтуудаа эхлүүлнэ. Тэдний хувьд өнөөдөр Сингапурыг зорьжээ.

Шигшээ багийн бүрэлдэхүүний тухайд Монголын 3х3 сагсан бөмбөгийн холбооны зүгээс эрэгтэй баг дээр сонирхолтой шийдвэр гаргав. 2023 онд Азийн аваргад түрүүлж байсан бүрэлдэхүүнээс О.Энхбаатар, Д.Дэлгэрням нарын оронд Ц.Отгонжаргал, Г.Дөлгөөн нарыг багтаасан аж. 3х3 сагсан бөмбөгийн арвин туршлагатай Ц.Отгонжаргалын хувьд мэргэжлийн Улаанбаатар ММС Энержи багт тоглож, олон улсад чамгүй амжилтыг үзүүлж, танигдсан нэгэн. Харин Г.Дөлгөөний хувьд 3х3 сагсан бөмбөгийн өсвөр, залуучуудын шигшээ багт тоглож, ирээдүйтэй гэдгээ харуулсан билээ.

Эмэгтэй багийн тухайд өнгөрсөн жил Улаанбаатар хотноо болсон дэлхийн Гран пригийн цувралд тэмцээнд түрүүлсэн багаа илгээсэн аж.

Шигшээ багийн ахлах дасгалжуулагчаар канад мэргэжилтэн Стив Сир, туслах дасгалжуулагчаар Г.Цэнгүүнбаяр ажиллаж байна.