АНУ-ын Йеменд довтлох төлөвлөгөө групп чатанд санаандгүй задарсан хэрэг гараад буй. Энэ нь үндэсний аюулгүй байдалд нөлөөлөх асуудал тул сенатор Рон Уайден Үндэсний аюулгүй байдлын зөвлөх Майк Вальц, Батлан ​​хамгаалахын сайд Пит Хэгсет нарыг огцрохыг уриалав.

Цагаан ордны өөр нэгэн эх сурвалж “Цагаан ордонд байгаа хүн бүр нэг зүйл дээр санал нийлж чадна. Майк Вальц бол тэнэг” гэжээ.

Харин Трамп Майк Вальцыг огцруулах бодолгүй байгаагаа “Fox News”-т мэдээлжээ. Тэрбээр Майк Вальцыг сурах юмаа сураад авчихсан сайн залуу гэж тодорхойлсон байна. “Atlantic” хэвлэлийн редактор яаж яваад групп чатад нэмэгдсэнийг түүнээс асуухад “Голдберг, Майкл нар өмнө нь утсаар ярьсан байсан” гэжээ.

Хүмүүс АНУ-ын засгийн газрын системийн оронд групп чатад хуваалцсан эмзэг материалын талаар хэлэлцэж байгааг зарим шүүмжлэгч буруушаасан байна.

Үндсэндээ Трамп болсон явдлыг үл тоомсорлосон байдалтай байгааг “Daily mail” мэдээлжээ. Тэрбээр “Голдберг тэр чатад байлаа гээд ямар ч нөлөө үзүүлэхгүй. Довтолгоонууд төгс амжилттай болсон. Хоёр сарын дотор гарсан цорын ганц алдаа энэ байлаа. Энэ нь тийм ч ноцтой алдаа биш” гэжээ.

Харин “Atlantic” хэвлэлийн редактор энэ талаар ярилцлага өгөхдөө “Майк Вальц Оросын тагнуул, Хусит бүлэглэл, аль эсвэл АНУ-ын аль нэг дайсныг тэр чатандаа урьчихаагүйд баяртай байна” гэв.

Батлан хамгаалахын сайд Пит Хегсэт “Atlantic” хэвлэлийн редактор Голдбергийг “Удаа дараа худал хуурмаг мэдээ түгээж байсан нэр хүнд муутай сэтгүүлч. Худал хуурмагийг наймаалцахдаа мэргэжлийн хүн” гэж шүүмжилжээ.