АНУ-ын хэлэлцээчид Саудын Арабт Орос, Украины талуудтай тус тусад нь уулзаж, гал зогсоох талаар хэлэлцсэн билээ. Хэлэлцээний дараа Орос, Украины талууд далай тэнгист гал зогсоох, эрчим хүчний дэд бүтцэд цохилт өгөхөө зогсоох гэсэн тохиролцоонд хүрснийг Цагаан ордон мэдэгдэв. Далай тэнгист гал зогсоох нь арилжааны тээвэрлэлтийг саадгүй явуулах чухал ач холбогдолтой шийдвэр гэдгийг Трампийн засаг захиргаа онцолж байна.

ОХУ хэлэлцээг зөрчиж, Хар тэнгист цэргийн хөлөг онгоцуудаа хөдөлгөвөл Украин өөрийгөө хамгаалах бүрэн эрхтэй гэж Украины Батлан хамгаалахын сайд Рустем Умеров мэдэгджээ.

АНУ-аас ОХУ-д зориулсан тусгай нөхцөлд "Москвагийн хөдөө аж ахуй, бордооны экспортын дэлхийн зах зээлд нэвтрэх боломжийг сэргээж, далайн даатгалын зардлыг бууруулна, боомт болон энэ төрлийн гүйлгээний төлбөрийн системд нэвтрэх боломжийг сайжруулахад тусална" гэж онцолжээ. Харин Украинд зориулсан тусгай нөхцөлд "АНУ дайны олзлогдогсдыг солилцох, энгийн хоригдлуудыг суллах, албадан шилжүүлсэн украин хүүхдүүдийг буцааж өгөхөд туслах үүрэг хүлээсэн хэвээр байна" гэжээ.

ОХУ-ын Гадаад хэргийн сайд Сергей Лавров "Кремль аюулгүй байдлын тодорхой баталгааны үндсэн дээр Украинтай далайд гал зогсоохтой адил шинэ гэрээ байгуулахад бэлэн байна. Зөвхөн Украинтай дангаараа хийж байсан гэрээ хэлэлцээрийн гунигт туршлагатай харьцуулбал энэ удаад юуг хийх, юуг хийхгүй байхыг АНУ зааварчлах нь" гэв.

Саудын Араб дахь яриа хэлэлцээ үндсэндээ гурван өдөр дамнав. Энэ хугацаанд Орос, Украины талууд огт нүүр тулаагүйгээрээ онцлог. Далай тэнгист гал зогсоохыг тохирсон гэдэг нь ахиц муутай байсан хэлэлцээг нэг алхам урагшлуулсан үйлдэл гэж үзэж байна.

Хэлэлцээрийн талаар дэлгэрэнгүй мэдээлэл хараахан гараагүй байгаа ч НҮБ болон Туркийн зуучлалаар байгуулж байсан 2022 оны хэлэлцээр сэргэж байгаа бололтой. Хар тэнгисийн үр тарианы хэлэлцээр гэгддэг энэ гэрээ нь Украинд Хар тэнгисийн боомтуудаас хүнс, бордоог аюулгүй тээвэрлэх боломжийг олгох зорилготой юм. Дайны улмаас үүссэн дэлхийн хүнсний хямралаас урьдчилан сэргийлэхийн тулд энэ гэрээг анх байгуулж байв. Гэвч барууны орнууд экспортын хориг арга хэмжээг зөөлрүүлэх амлалтаа биелүүлээгүй гэсэн үндэслэлээр ОХУ 2023 онд хэлэлцээрээс татгалзжээ.