Хаврын хуурайшилтын эхэлсэн энэ үед онцгой байдлын газарт ахуйн болон ой, хээрийн түймрийн дуудлага  ирэх нь нэмэгдэж байгаа ажээ. Иргэдийн санамсар болгоомжгүй үйлдлээс буюу шар өвс шатаах, татсан тамхины ишээ бүрэн унтраахгүй хаях зэргээс  ой, хээрийн түймэр гарч байгааг албаныхан хэлж буй.

Он гарснаас хойш өнөөдрийг хүртэл ОБЕГ-т 28 удаагийн ой, хээрийн түймэр бүртгэгджээ. Эдгээр түймрийн улмаас 887 га ой, 1398000 га хээрийн талбай, 39 гэр, 15 сууц, 6 автомашин, 11 мотоцикл, 75 хашаа 27 өвөлжөө, 40 хаваржаа, 6937 бог мал, 569 бод мал, 7930 орчим боодол өвс шатсан хохирол учирсан байна.

Тухайлбал, 2024 онд нийслэлийн хэмжээнд шар өвсний гал түймрийн 48 тохиолдлоор 62.7 га талбай шатаж, иргэдийн өмч хөрөнгө, байгаль экологид хохирол учирсан байна. Ногоон бүсийн хуурайшилт нь болзошгүй ой, хээрийн түймэр болон шар өвсний гал түймрийн аюул, эрсдэлийг нэмэгдүүлдэг.

Иймд, нийслэлийн ногоон бүсэд зорчиж буй иргэд, зуслангийн чиглэлд оршин сууж буй айл өрхүүд цогтой үнс нурмаа тагтай төмөр саванд хийж хэвших, тамхи, чүдэнз, ил галыг бүрэн унтраан, айл өрхүүд хашааны шар өвс, хог хаягдлыг ил задгай шатаахгүй байхыг онцгойлон анхаарууллаа.