УИХ бол ард түмний төлөөллийн байгууллага. Атал манай УИХ-ын гишүүд өөрсдийгөө ард түмнээс давуу эрхтэй, "хаан, заан" гэж боддог нь худлаа биш. Тэд наадам, цагаан сараар ард түмнээсээ ангид суудалд сууна. Айлчлал болгоныг дагалдаж, галуу, шувууны мах идэж яваагаа гайхуулна. Тэдний гишүүний урамшуулал, томилолтын зардал элдвийн халамж, хангамжийг олох гэж хувийн хэвшлийнхэн хуруу хумсаа хуйхлах нь холгүй ажилладаг.  Ядаж байхад УИХ-аас баталсан татвар, шимтгэл, торгуулийг нэмэгдүүлэх хууль, тогтоомж ядарсан иргэдэд дарамт болсоор ирсэн.

Монгол Улсын иргэдийн дундаж цалин 1.5 сая бол  парламентын гишүүд сар бүр урамшуулал нэрээр 23 сая төгрөг авдаг. Нэг гишүүнд олгодог 23 сая төгрөгийг нийт 126-гаар үржүүлбэл багагүй тоо гарна. Атал сар болгоныхоо урамшууллын мөнгөө УИХ-ын гишүүд голж, чамлаж нэмэх шаардлага тавих болсон байна. Тухайлбал, баруун бүсээс УИХ-д сонгогдсон О.Амгаланбаатар хэвлэлд ярилцлага өгөхдөө гишүүний сарын урамшуулал гэж өгдөг 20 гаруй сая төгрөг хаана ч хүрэхгүй зовж яваагаа дуулгажээ. Тэрбээр сарын 23 сая төгрөгийн урамшууллаа тав дахин нэмэгдүүлж, 100 сая болгохыг шаардах гэнэ. Түүний хувьд баруун бүсийн зарим аймаг, сумаар уулзалт хийхэд 30 сая төгрөг болсон, тал мөнгийг нь өөрийнхөө халааснаас гаргасан юм байх. О.Амгаланбаатарын хүсэж байгаачлан 126 гишүүний сарын урамшуулалыг нэмэгдүүлж, 100 сая төгрөг болговол төсвийн зардал эрс өснө. Үүнийг олох гэж хувийн хэвшлийнхэн багагүй чардайж мэдэхээр байна.

Дээр нь УИХ-ын гишүүнээр ажиллаж байгаад ахин сонгогдоогүй гишүүдэд төсвөөс бүтэн жилийн хугацаанд сар бүр тэтгэмж урамшуулал гэж дөрвөн сая төгрөг олгодог.  ӨБмнөх парламентаас гэхэд 38 гишүүн ажилгүйдлийн тэтгэмж сар болгон авч байна. Атал Монголд ийм өндөр цалин авдаг эмч, багш байхгүй.

Төрийн ордонд суугаа хууль санаачлагчид нь албан тушаалаа урвуулан ашиглаж, энэ мэт өөрсдийнхөө эрх ашигт нийцсэн хууль батлах мөртлөө эсрэгээрээ иргэд, аж ахуйн нэгжээс авах татвар, шимтгэлээ нэмэгдүүлсээр. УИХ-ын гишүүд таргалж байвал улс орон ядуурах, иргэд нь элгээрээ мөлхөж амьдрах нь тэдэнд хамаагүй бололтой.

Б.ШАРХҮҮ