Өмнөд Солонгосын нийслэл Сөүл хотын Гандон дүүрэгт Даваа гаригийн 18:30 цагийн орчимд авто зам цөмөрч, асар том нүх үүсчээ. Тэрхүү 20 метр өргөн нүхэнд унасан мотоциклын жолоочийг эрэн хайж байсан ч нас барсан болохыг саяхан мэдээллээ. Аврагчид Мягмар гаригийн өглөө 11:00 цагийн орчимд  50 метрийн гүнээс түүний цогцсыг олсон байна. Цогцсыг олохоосоо өмнө тэд 20 метрийн гүнээс мотоцикл болон гар утас олоод байжээ.

Хохирогч 30 гаруй насны эрэгтэй хүн байсан бөгөөд нэрийг нь хараахан зарлаагүй байна.

Хяналтын камерын бичлэг харвал урд нь өөр нэг машин явж байсан ч нүхнээс бултаж чаджээ. Тус машины жолооч гэмтсэн учир ойролцоох эмнэлэгт хүргэгдсэн.

Цөмөрсөн нүхэнд 2000 тонн хөрс шороо болон ус холилдсон байсныг Гандон дүүргийн дарга Ким Чан Соп хэлжээ. Ямар учраас нүх үүссэнийг хараахан тодруулаагүй байна. Саяхан нийтэлсэн тайланг харвал сүүлийн 10 жилийн хугацаанд Сөүл хотод 223 одоо ийм байдлаар газар цөмөрчээ.

Японы Яшио хотод ч бас авто зам цөмөрч, жолооч нь сураггүй болсон хэрэг өнгөрсөн нэгдүгээр сард гарсан. Малайзын Куала Лумпурт өнгөрсөн оны наймдугаар сард мөн ижил байдлаар нүхэнд унаж сураггүй болсон эмэгтэйг долоо хоног хайгаад эрлийг зогсоож байв.

Шохойн чулуу, эсвэл шохойн бүтэцтэй чулуу хагарч задарснаас болж газар цөмрөх нь элбэг байдаг. Зарим тохиолдолд энэ үйл явц аажмаар явагдсаар, урт хугацаандаа том нүх үүсдэг. Шохойн чулуу өөр чулуун давхаргын доор орсноор хагарч, ууссан ч газрын гадаргуу дээр шинж тэмдэг нь ил мэдэгдэхгүй. Малтлага гэх мэт хүний үйл ажиллагаанаас үүдэлтэйгээр нүх үүсэх үйл явц улам хурдасч болдог.