Монголын сагсан бөмбөгийн дээд лигийн 2024-2025 оны улирлын плей-оффын хагас шигшээ шат эхэлсэн. Энэ шатны сонирхолтой учраа болох Хасын Хүлэгүүд болон Сэлэнгэ Бодонс багуудын цуврал 1:1 гэсэн харьцаатай үргэлжилж буй. Талбай дээрх өрсөлдөөн ч савнаасаа хальж, тамирчдын дундах сөргөлдөөн үүссэн.

Цувралын хоёр дахь тоглолтод Сэлэнгэ Бодонс өрсөлдөгчөө илт илүүрхэж, цувралыг тэнцүүлсэн. Тус тоглолтын үеэр Хасын Хүлэгүүд багийн тамирчид болох Б.Барсболд болон Б.Саруул-Эрдэнэ эсрэг багийнхаа тамирчдад дээр зүй бус үйлдэл гаргасан нь телевизийн бичлэгт үлджээ. Улмаар энэхүү үйлдлүүд нь сагсан бөмбөг сонирхогчдын анхаарлыг татаж, маргааны сэдэв болов.

Тэгвэл Монголын сагсан бөмбөгийн холбооны Мэргэжлийн зөвлөл болон ажлын хэсгээс дээрх үйлдлүүд дээр хариуцлага тооцжээ. Тодруулбал, Н.Батбаярын биед халдсан гэх үндэслэлээр Б.Барсболдыг нэг тоглолт өнжүүлэхээр болж, 500 мянган төгрөгөөр торгосон бол М.Бишрэлт дээр спортын бус зүй бус үйлдэл гаргасан Б.Саруул-Эрдэнийг 300 мянган төгрөгөөр торгосон аж. Түүнчлэн Хасын Хүлэгүүд багийг гурван сая төгрөгөөр торгох шийтгэл ноогдуулав.

Ингэснээр Б.Барсболд Пүрэв гаригт Сэлэнгэ Бодонсын эсрэг цувралын гурав дахь тоглолтод оролцохооргүй болж байна. Гэхдээ бүрэлдэхүүн зузаан Хүлэгүүдэд О.Сэргэлэн, Э.Эрмүүнзаяа гээд түүнийг орлочих бололцоо бий.

Хасын Хүлэгүүдийн зүгээс хариуд нь Монголын сагсан бөмбөгийн холбооны Мэргэжлийн зөвлөлд хандан Сэлэнгэ Бодонс багийн тамирчин ДеМаркус Казинс болон дээд лигийг дэнсэлж буй гадаад шүүгч хоёр хамтдаа эмчилгээний өрөөнд байгаа гэрэл зургийг илгээн арга хэмжээ авахыг хүсчээ. Харин Мэргэжлийн зөвлөлийн зүгээс Хувь хүний мэдээллийг хамгаалах тухай хуулиар "эмзэг мэдээлэл" гэж үзэн ашиг сонирхлыг зөрчил үүссэн гэж дүгнэх боломжгүй гэжээ.