Гадаад харилцааны сайд Б.Батцэцэгээс сэтгүүлчид өнөөдөр /2025.03.24/ тусгай үүрэгт элчин сайдуудын томилгоотой холбоотой асуудлаар тодрууллаа.

Гадаад харилцааны сайд Б.БАТЦЭЦЭГ:

-Тусгай үүрэг гүйцэтгэгч элчин сайд гэдэг нь гадаад улсад томилогддог элчин сайд биш. Ямар нэг тодорхой асуудлыг хариуцаад Монгол Улсын Засгийн газар болон Гадаад харилцааны амыг төлөөлөн гадаадын улс оронтой яриа, хэлэлцээ хийх боломжтой, эсвэл дотооддоо гадаад харилцаатай холбоотой ямар нэгэн тодорхой асуудал, сэдвийг хариуцаж ажилладаг, тэр асуудал нь дуусангуут үүрэгт ажлаас чөлөөлөгддөг албан тушаал.

Төрийн гурван өндөрлөгт ажиллаж байсан хүмүүсийг тусгай үүрэгт элчин сайдаар томилсон Засгийн газрын тэмдэглэл гарсан.

Монгол Улс залуу улс. Улстөрчид ч мөн харьцангуй залуу хүмүүс байдаг. Тиймдээ ч улс төрөөс эрт буудаг практиктай. Төрийн гурван өндөрлөгийн тухайд үеийн үед өмнөх удирдлагуудтай байнгын харилцаа холбоотой, санаа оноог нь сонсч ажилладаг. Тэгэхээр өөр, өөр цаг үед энэ төрийг удирдаж явсан хүмүүст амьдралын бөгөөд ажлын асар их туршлага хуримтлагдсан байдаг. Бид ардчиллын замыг замнаад удаагүй байгаа ард түмэн. Алдаа оноо зөндөө байсан. Тэгэхээр миний хувьд тусгай үүрэгт элчин сайдаар төрийн гурван өндөрлөгөөр ажиллаж байсан хүмүүсийг томилж ажилуулах нь зөв гэж бодож байгаа. 14 мега төсөл болон бусад улс орны хөгжилд хэрэгтэй томоохон төслүүдийг өөрсдийнх нь санал дээр үндэслэж хариуцуулж явбал Монгол Улсад хэрэгтэй.

Тусгай үүрэгт элчин сайдууд ямар ч хөлсөөр ажиллаагүй, төрөөс мөнгө төгрөг нэхээгүй. Гадаад улс оронд очиж амьдрахгүй.

Яг л улсынхаа хөгжлийн төлөө гар биеэ зориулъя гэсэн сэтгэлээр хамтарч ажиллаж байна. Засгийн газрын бүрэн эрхт төлөөлөгч гэж олон улсад байдаг. Ерөнхийлөгч, ерөнхий сайд нь тусгай эрх өгөөд ажиллуулдаг нэг хэлбэр байна. Тусгай үүрэг гүйцэтгэгч элчин сайдын тухайд Гадаад харилцааны яамны дэргэд байдаг албан тушаал. Тусгай үүрэг гүйцэтгэгч элчин сайдууд Монголд үеийн үед байсан. Голдуу дипломатууд байдаг учир олон нийт төдийлөн сайн мэдэхгүй байх.

Эцэслээгүй байгаа. Одоогоор 12 хүн байна. Ямар, ямар төсөл хариуцах вэ? гэдгийг Эдийн засаг хөгжлийн яам өөрсдтэй нь болон ерөнхий сайдтай зөвшилцөж, эцэслэн шийднэ.

Одоо бол яриа хэлэлцээний замдаа л байна гэсэн үг. Эдийн засгийн коридорын төсөл, Газын хоолой, төмөр замтай холбоотой төсөл ч юм уу аль нэг дээр тусгай үүрэгт элчин сайд ажиллаад тухайн ажил нь болсон гэсэн тохиолдолд үүрэгт ажлаасаа чөлөөлөгдөнө.