АНУ-ын Виржиниа мужийн зүүн дүүргийн өмгөөлөгч асан Жессика Абер Бямба гаригт Александриа хотод нас барсан байдалтай олджээ. Бямба гаригийн өглөөний 09:18 цагийн орчимд хотын цагдаа нар Беверли Драйвын "900" блокоос амьдын шинжгүй эмэгтэй олдсон талаар анх мэдээлсэн байна. Хэргийн газарт холбогдох албан тушаалтнууд очсоны дараа түүнийг 43 настай Жессика Абер гэж тодорхойлжээ.

Одоогоор үхлийн шалтгааныг тогтоох мөрдөн байцаалтын ажиллагаа явагдаж байна.

Жессика Абер 2009 онд АНУ-ын Виржиниа мужийн зүүн дүүргийн шүүхээс ажлын гараагаа эхэлж байв. Энд ажиллах хугацаандаа тэр санхүүгийн залилан, олон нийтийн авлига, хүчирхийллийн гэмт хэрэг, хүүхдийн мөлжлөгийн хэргүүдийг шүүж байжээ. Улмаар 2015-2016 онд Хууль зүйн яамны Эрүүгийн хэлтсийн ерөнхий прокурорын туслахын зөвлөх, 2016-2021 онд Виржиниа мужийн зүүн дүүргийн АНУ-ын дүүргийн шүүхийн эрүүгийн хэлтсийн орлогч даргаар тус тус ажилласны эцэст 2021 онд Жо Байдены тушаалаар улсын өмгөөлөгч болжээ.

Дональд Трампийг тангараг өргөх өдөр тэр үүрэгт ажлаасаа огцорч буйгаа зарласан. Тэрбээр "Виржиниа мужийн зүүн дүүргийн прокуророор ажиллах хугацаандаа дэлхийн өнцөг булан бүрт байгаа иргэдэд нөлөөлж буй асуудлыг зохицуулдаг авъяаслаг, шаргуу төрийн албан хаагчидтай аз завшаанаар хамт ажиллалаа. АНУ-ын өмгөөлөгчөөр тус дүүрэгт ажлаа дуусгасан нь хэмжээлшгүй нэр төрийн хэрэг байлаа. Энэ албыг хаших боломж олгосон сенатор Марк Уорнер, Тим Кейн болон ерөнхийлөгч Байден нарт гүнээ талархаж байна" гэжээ.