Эмч П.Батчулуунд холбогдох хэрэгт донор болж хохирсон талийгаачийн ар гэрийнхэн өнөөдөр /2025.03.24/ мэдээлэл хийлээ.

Талийгаачийн ээж Д.Алтантуяа:

-Миний талийгаач охин болон ар гэрийнхнийг нь олон нийтийн сүлжээгээр буруутан болгож байгаа учраас сэтгэл өвдөөд мэдээлэл хийж байна. Ард иргэдэд энэ хэргийн талаар үнэн зөв мэдээллийг өгөхийг хүссэн юм. Миний охин 2023 оны наймдугаар сарын 5-6-нд шилжих шөнө авто осолд орж, ГССҮТ дээр хүргэгдэн очсон. Биднийг өглөө эмнэлэг дээр ирэхэд тархины үхжилттэй гээд хагалгаа хийчихсэн байсан. Тэр үед би ухаан мэдрэлгүй байсан. Тэгээд дараа өдөр нь ГССҮТ-ийн эмч нар "Охиноо тархины үхэлтэй донор болгох уу. Ийм тохиолдолд 1000-д нэг удаа сэхэх магадлалтай байдаг" гэж тайлбарлаж байсан. Тиймээс П.Батчулуун эмчтэй уулзаад түмэнд буян болъё гэдэг үүднээс охиныхоо хоёр бөөр, элгийг хандивлахыг зөвшөөрсөн.

Асуудал үүссэний дараа П.Батчулуунтай уулзахад "Уучлаарай" гэдгээс өөрийг хэлж чадахгүй байсан. Анх талийгаачийн элэг, бөөрийг авна гэж зөвшөөрүүлсэн. Дараа нь"Ганц нэг судсыг нь авна шүү" гэж П.Батчулуун эмч хэлсэн.  Тэгээд хөлний бүх эрхтэн, ясыг нь авчихсан байсан. Ингэхийг мэдсэн бол би охиноо донор болохыг зөвшөөрөхгүй байсан.

Талийгаачийн хөлний судас шөрмөс, тойгны яс гээд бүгдийг нь авах байсан бол анхнаасаа зөвшөөрөхгүй байсан.

Одоо өөрийгөө буруутгаад сууж байна. Бид эмч нараас мөнгө төгрөг нэхээгүй. Яагаад олон нийтийн сүлжээгээр нэг талын мэдээлэл цацаж, биднийг зовоогоод байгаа юм бэ. Миний охин ажилд ороод зургаа, долоон сар л болж байсан. Тэгээд нийгмийн даатгалын газраас асуухад донорын нөхөн олговор болох 3.5 сая төгрөгийг өгөх боломжгүй гэсэн. Тэглээ гээд бид хэнээс ч мөнгө төгрөг нэхээгүй. Гэтэл талийгаачийн ар гэрийг нь их мөнгө төгрөг авсан мэтээр мэдээлж байна. Миний охины хэргийг дахин битгий сөхөөч ээ. Ээжээсээ өнчирч хоцорсон хүүхдүүдийг маань байртай болгоход хандив өргөсөн ард түмэндээ баярлаж байна.