Туркийн ерөнхийлөгч Режеп Тайип Эрдоганы гол өрсөлдөгч гэгддэг Экрем Имамоглуг баривчилснаар улс орон даяар эсэргүүцлийн жагсаал өрнөсөн билээ. Истанбул хотын дарга Экрем Имамоглу Бүгд найрамдах ардын намаас 2028 оны ерөнхийлөгчийн сонгуульд нэр дэвшигчээр тодрох ёстой байв. Түүнийг авлигын хэрэгт буруутгаж буйг Имамоглу үгүйсгээд, улс төрийн зорилготой үйлдэл гэжээ. Тэрбээр цагдан хоригдохоосоо өмнө "Х" хаягаараа “Би хэзээ ч бөхийхгүй” гэж бичжээ. Мөн өөрийг нь баривчилсан явдлыг "Манай ардчилалд үүссэн хар толбо" гэв.

Өнгөрсөн Лхагва гаригт мөрдөн байцаалтын ажиллагааны хүрээнд улстөрч, сэтгүүлч, бизнесмен зэрэг 100 гаруй хүнийг баривчилсны нэг нь Имамоглу байв.

Тэгвэл Ням гаригт Имамоглуг гэмт хэргийн байгууллага байгуулж, авлига авсан, луйвар хийсэн, хувийн мэдээллийг хууль бусаар бүртгэсэн, тендер будилаантуулсан хэргээр буруутган албан ёсоор баривчилж, Силиври дахь шоронд хүргэжээ. Түүнийг шүүх хурал хүртэл цагдан хорих шийдвэр гарсан байна. Мөн түүнийг хотын даргын албан тушаалаас нь түдгэлзүүлжээ.

Жагсаал цуглааныг хориглосон ч ард иргэд тав дахь өдрөө жагсч байна. Жагсаал эхэлснээс хойш 700 гаруй хүн баривчлагджээ.

Баривчлагдсан нь Имамоглуг ерөнхийлөгчөөр нэр дэвших, сонгогдоход саад болохгүй ч гэм буруутай нь тогтоогдвол сонгуульд оролцох боломжгүй болно. Ням гаригт болсон санал хураалтаар 15 сая орчим хүн Имамоглуд саналаа өгчээ. Тэдний 1.6 сая орчим нь Бүгд найрамдах ардын намын гишүүд байсан бол бусад нь Имамоглутай эв санааны нэгдлээ илэрхийлэхийг хүссэн хүмүүс байсан гэв.