Португалын Лиссабон болон Данийн Копенхаген хотуудад цахим спортын "CS2" төрлийн "BLAST Open Spring" тэмцээн эхэлсэн. Нийт 400 мянган ам.долларын шагналын сантай тус тэмцээнд дэлхийн шилдэг 16 баг оролцож байгаагийн дотор Монголын "The MongolZ" болон "The Huns" багууд багтаж буй.

"The Huns" баг Саудын Арабын "Falcons" багт хожигдож, тэмцээнээ өндөрлүүлсэн бол "The MongolZ" баг өнөөдөр/2025.03.23/ Украины "NaVi"-тай хэсгийн ээлжит тоглолтоо хийлээ. Хоёр багийн эхний тоглолт "dust2" мап дээр болоход 13-7 гэсэн харьцаатай Украины баг ялав. Харин хоёр дахь тоглолт "Inferno" дээр болоход Монголын баг 13-1 гэсэн харьцаатай бүрэн утгаараа, бүх талаараа илүүрхэж, цувралын харьцааг тэнцүүлсэн. Улмаар шийдвэрлэх мап "Mirage" дээр болж, хоёр баг эхний хагаст тэнцүү тоглож, хоёрдугаар хагаст "The MongolZ" ялимгүй илүүрхэж, үеийн харьцааг 12-9 болгож, "NaVi"-г хожиход ердөө ганцхан үед л илүүрхэхэд хангалттай байв. Гэвч "NaVi" харьцааг 12-12 болгон тэнцүүлж, нэмэлт цаг гарсан. Нэмэлт цагт ч Украины баг дийлдсэнгүй, 16-13 гэсэн харьцаатай хожжээ.

Хоёр баг хэдхэн хоногийн өмнө тоглоход "The MongolZ" хожиж байсан бол энэ удаад "NaVi" хариугаа авчээ.

Ийнхүү "The MongolZ" доод бүс рүү унаж, өнөөдөр 23.00 цагаас Азид харьяалагдаж эхэлсэн АНУ-д төвтэй баг болох "Liquid"-тай тоглохоор боллоо. Хоёр багийн хожигдсон нь хасагдах болно. Харин "NaVi" хэсгийн аваргын төлөө Туркийн "Eternal Fire"-тай тоглоно.