Израилийн арми өнгөрч буй долоо хоногт Газын зурваст хуурай замын шинэ ажиллагаа эхлүүлсэн билээ. Тэгвэл энэ ажиллагаа эхэлснээс хойш 200 гаруй хүүхэд амь үрэгдээд буйг "Al Jazeera" мэдээлэв. Нийтдээ 590 гаруй хүн амиа алдсан бөгөөд хуурай замын довтолгоо улам эрчимжиж байгаа тул нас барагсдын тоо цаашид ч нэмэгдэх төлөвтэй байна.

Израилийн Батлан хамгаалахын сайд Израиль Кац "Хамас бүлгийнхэн Газын зурваст хоригдож буй бүх олзны хүмүүсийг суллах хүртэл бид бүс нутгийг эзлэн авна. Тэд татгалзах тусам илүү их газар нутгаа алдаж, бидний мэдэлд шилжүүлэх болно. Барьцааны хүмүүсийг суллахгүй л бол Израиль Газын зурвасын улам олон газрыг байнгын хяналтдаа авна" гэжээ.

Мөн Хамасын эсрэг кампанит ажлыг эрчимжүүлж, цэрэг болон иргэний бүхий л төрлийн шахалтыг ашиглана гэв.

Газын зурваст ирэх тусламж ихээхэн хумигдсан тул нөхцөл байдал түгшүүртэй байгааг НҮБ-ын Палестины дүрвэгсдэд туслах агентлагийн төлөвлөлт хариуцсан захирал Сэм Роуз хэлэв. Тэрбээр "2023 оны аравдугаар сард мөргөлдөөн эхэлснээс хойш анх удаа тусламж ирэлгүй ийм удаж байна. Хамгийн урт хугацаа. Гал зогсоох хэлэлцээрийн сүүлийн зургаан долоо хоногт тусламжийн системийн хувьд бүх зүйл эсрэгээрээ байна" гэжээ.