ОХУ-ын ерөнхийлөгч Путин Сирийн түр удирдагч Ахмед аль-Шараад зурвас илгээжээ. Тэрбээр Сирийн нутаг дэвсгэрийн бүрэн бүтэн байдлыг хангах хүчин чармайлтыг дэмжиж, олон төрлийн асуудлаар хамтран ажиллахад бэлэн гэж дамжуулсныг Кремль мэдэгдэв.

Удирдагч асан Башар аль-Ассадын дэглэм өнгөрсөн оны арванхоёрдугаар сард нуран унасан. Үүний дараа ОХУ Сири дэх баазууддаа санаа тавих шаардлагатай болсон. Сирид шашны бүлэглэлүүд үймж байгаад ОХУ түгшиж буй. Ассадын гэр бүлийн 50 гаруй жилийн засаглалын хугацаанд ОХУ тэдний гол холбоотон байв. Гэвч өдгөө Сирийн тогтворгүй байдал Ойрхи Дорнодыг бүхэлд нь хамарч болзошгүй байгаа тул нэгдмэл, найрсаг Сирийг харахыг хүсч буйгаа Кремль энэ сарын эхээр мэдэгдсэн юм.

Ассадын дэглэм нуран унасны дараа ОХУ Сирийн хойд хэсэг дэх фронтын шугам болон алавит шашинтнууд давамгайлсан уулархаг газруудаас цэргээ татсан ч Газар дундын тэнгисийн эрэг дэх хоёр үндсэн бааз гэгддэг Хмеймим агаарын бааз, Тартус тэнгисийн цэргийн байгууламжаа хараахан орхиогүй байна.