Холбооны засгийн газрыг цомхотгох хүчин чармайлтын хүрээнд Пентагон цэргийн дээд албан тушаалтнуудыг олон тоогоор цомхотгох талаар хэлэлцэж байна. Хэлэлцэж буй төлөвлөгөөнд байлдааны командлалуудыг нэгтгэх, хамтарсан хүчний хөгжил, сургалт, боловсролыг хариуцдаг захиргааг татан буулгах, АНУ-ын Япон дахь цэргийн хүчний тэлэлтийг зогсоох зэрэг багтжээ. Мөн Европын командлал, Африкийн командлалыг Германы Штутгарт хотод төвтэй нэг команд болгон нэгтгэж, АНУ-ын хойд болон өмнөд хэсгийн командуудыг нэг "AMERICOM" команд болгон нэгтгэнэ гэсэн нь мэдээлэл анхаарал татаж байна.

Командлалуудыг нэгтгэснээр Пентагон ирэх таван жилд ойролцоогоор 330 сая ам.доллар хэмнэх боломжтой юм. Харин Япон дахь цэргийн хүчний өргөтгөлийг зогсоосноор 1.1 тэрбум ам.доллар хэмнэх боломжтой.

Засгийн газрын үр ашгийн хэлтэс Пентагон болон бусад холбооны агентлагуудыг мөнгөө хэмнэхийн тулд томоохон цомхотгол хийхийг шаардаж буй. Тиймээс АНУ-ын батлан ​​хамгаалахын албаныхан энэ сард дээрх баримт бичгийг бэлтгэжээ.

АНУ-ын цэргийн жилийн төсөв одоогийн байдлаар 800 тэрбум ам.доллараас даваад байна. Хилийн аюулгүй байдлыг эс тооцвол ирэх таван жилд энэ төсвийг эрс танах төлөвлөгөөг бэлтгэхийг Батлан хамгаалахын сайд Пит Хегсет өнгөрсөн сард тушаажээ.

Дашрамд дурдахад, Пентагоны тэргүүн Пит Хегсэт Баасан гаригт Элон Маскийг хүлээн авч уулзжээ. Энэ уулзалтаар Хятадтай хийж болзошгүй дайны талаарх АНУ-ын төлөвлөгөөг Элон Маскт танилцуулна гэх мэдээлэл зарим хэвлэлд гарсан. Гэвч  эхний мэдээллээс хэдхэн цагийн дараа Трамп үүнийг няцаажээ. Пентагонтой хийх уулзалтаар “Хятадын талаар хэлэлцэхгүй, дурсах ч үгүй” гэж тэр хэлжээ. Харин Пентагоны хэвлэлийн төлөөлөгч Шон Парнелл “Энэ бол 100 хувь худал мэдээ. Увайгүй, хорон санаатай худал үг. Элон Маск эх оронч хүн. Бид түүнийг Пентагонд зочилсонд баяртай байна” гэжээ. Батлан ​​хамгаалахын сайд Пит Хегсет уулзалтын өмнөх орой "Энэ бол Хятадтай хийх дайны төлөвлөгөөний" тухай уулзалт биш. Энэ бол инноваци, үр ашиг, илүү ухаалаг үйлдвэрлэлийн тухай албан бус уулзалт юм. Гайхалтай байх болно!" гэж жиргэсэн байна.