Монголд хиймэл оюуны экосистем байгуулах үндэсний стратеги,өгөгдлийн тухай хууль хэрэгтэй байна.

Монгол Улсын тэргүүлэх компаниудын удирдлагуудыг нэг дор цуглуулж, туршлага солилцох, олон улсын менежментийн шилдэг чиг хандлагыг судлах боломжийг олгодог "МЕНЕЖМЕНТИЙН ФОРУМ-2025" Нэткапитал Санхүүгийн Групп амжилттай оролцлоо.

Хиймэл оюун ухаан ба түүний хэрэглээ хэсэгт группийн үүсгэн байгуулагч /Группийн Ерөнхийлөгч/ Д.Сүндий панелистаар оролцож, хиймэл оюун ухааны бизнесийн хөгжилд үзүүлэх нөлөө, технологийн дэвшлийн ач холбогдол, цаашдын хөгжлийн чиг хандлага зэрэг чухал асуудлуудаар санал бодлоо ярилаа.

Нэткапитал Санхүүгийн Группийн хувьд нь харилцагч төвтэй, AI-д суурилсан экосистем бий болгох зорилготой. Үүнд зөвхөн санхүүгийн үйлчилгээ биш, мөн бусад холбогдох үйлчилгээнүүдийг нэгдсэн нэг платформ дээр санал болгож, өгөгдөлд тулгуурласан шийдвэр гаргалтыг автоматжуулах зорилт тавьж ажиллаж буйгаа Үүсгэн байгуулагч /Группийн Ерөнхийлөгч/ Д.Сүндий онцолсон юм. Энэ зорилго нь технологийн хөгжлийг зөв ашиглан хэрэглэгчдэдээ илүү хурдан, хялбар, хувийн үйлчилгээ үзүүлэхийг эрмэлзэж буйг харуулж байна.

Тэрбээр панел хэлэлцүүлгийн үеэр дараах санаануудыг онцолж хэллээ:

Хиймэл оюун болон их өгөгдлийн технологи 2023 оноос бодитоор эдийн засгийн өсөлтийн гол хөдөлгүүр болж эхэлсэн. Тодруулбал, бизнесийн үйл ажиллагааг автоматжуулах, үр ашгийг нэмэх, өгөгдөлд суурилсан шийдвэр зэргээр эерэг нөлөө үзүүлж байна. Судлаачдын үзэж буйгаар хиймэл оюун нь мэдээлэл боловсруулалт, автоматжуулалт, ажлын урсгалын өөрчлөлт гэсэн гурван зүйлд тулгуурлаж, байгууллагын бүтээмжид хувьсгал хийхээр байна. Улмаар 2050 он гэхэд AGI (Artificial general intelligence) болон ASI (Artificial Superintelligence) хөгжих аж. Мөн тэрээр ирээдүйд хиймэл оюуныг зохистой хэрэглэж чадах эсэх нь бизнесийн өрсөлдөх чадварыг тодорхойлох гол хүчин зүйл болно гэдгийг онцолж хэллээ.

Нэткапитал Санхүүгийн Группийн танилцуулсан “AI Driven Organization" илтгэлийн гол санаануудыг хүргэхэд:

1. AI нь хүний хийдэг олон ажлыг илүү хурдтай, өндөр нарийвчлалтай, сэтгэлгээний алдаагүйгээр гүйцэтгэх боломжтой. Ингэснээр хүн шийдвэр гаргах үйл явцыг дэмжиж, зарим тохиолдолд бүр бие даан шийдвэр гаргах ч боломжтой. Жишээ нь, харилцагчийн асуултад хариулах, сэжигтэй гүйлгээг илрүүлэх, хөрөнгө оруулалтын зөвлөмж гаргах гэх мэт процессуудыг илүү хурдан шуурхай болгоно.
2. Ийнхүү AI-г үр дүнтэй нэвтрүүлбэл 50%-иар зардал хэмнэх, 60%-иар орлогоо өсгөх зэргээр бүтээмж өсөхөөр байгааг судалгаанууд харуулж байна. Гэхдээ AI-г зөвхөн автоматжуулалт гэж харах нь өрөөсгөл. Энэ бол илүү ухаалаг төлөвлөлт, оновчтой шийдвэр гаргах, өртөг зардал бууруулах тухай яриа юм.
3. Гэхдээ шинэ үеийн AI-д суурилсан компаниа болоход хоёр гол нөхцөл буюу шилжилт шаардлагатай. Нэгдүгээрт, AI үр дүнтэй ажиллахад чанартай өгөгдлийг, түүнийг удирдах өгөгдлийн менежмент хэрэгтэй. Хоёрдугаарт, ажлын урсгал ба бүтцээ шинэчилж, AI Agent-уудыг тодорхой чиг үүргүүд дээр ажиллуулах хэлбэр лүү шилжих шаардлагатай.
4. Мөн AI бүхий бизнес загварыг хөгжүүлэхийн тулд хүмүүсээ сургах, дахин чадваржуулах, үүнд шаардлагатай хөрөнгө оруулалтыг хийх нь зайлшгүй болж байна.

Товчхондоо, AI-д суурилсан алсын харааг хэрэгжүүлж чадвал Элон Маскийн хэлснээр “жижиг компаниуд том өрсөлдөөн үүсгэх” боломжтой болж, 500 ажилтантай ч AI-г ашиглан 50 мянган ажилтантай байгууллагатай нэг түвшинд өрсөлдөх чадвартай болно. Ингэснээр компани томорсон ч шийдвэр удаан гардаг, өгөгдөл хэт төвлөрдөг зэрэг том компани дээр гардаг уламжлалт сул талууд үүсэхгүй.