АНУ даяар "Тесла"-ийн олон мянган кибертракийг эргүүлэн татжээ. Тодруулбал, машины гадна талын зэвэрдэггүй ган хийцтэй бүрхүүл төмөр зарим хэсгээрээ салж унах магадлалтай гэсэн байна. "Тесла" компани ийм асуудлаар жолооч нараас 150 орчим нэхэмжлэл хүлээн авсан боловч ослын талаар мэдээлсэн зүйл алга байна.

"Тесла" компани найм дахь удаагаа ийм эргэн таталт хийж байгаа бөгөөд энэ удаагийнх хамгийн том хэмжээнийх нь болов.

Энэ асуудал 2023 оны арваннэгдүгээр сараас эхлэн үйлдвэрлэсэн 46 мянга гаруй машинд хамаатай. Автомашины технологийн "Cox Automotive" компанийн мэдээлснээр "Тесла"-ийн кибертрак АНУ-д ойролцоогоор 39 мянган ширхэг зарагджээ. Гэхдээ гадна бүрхүүл салж магадгүй гэх асуудал эргүүлэн татах тээврийн хэрэгслийн нэг хувьд л хамаатай гэж тооцоолсон байна. Харин шинээр худалдаж аваад удаагүй хүмүүс баталгаат хугацаандаа багтаад үнэгүй засвар үйлчилгээ авах юм.

Өмнө нь салхины шил арчигч эвдэрсэн, хаазны дөрөө гацсан, жолоодлогын хүч алдагдсан зэрэг шалтгаанаар "Тесла"-ийн кибертракуудыг эргүүлэн татаж байсан түүхтэй.

"Тесла"-ийн хувьцаа энэ оны нэгдүгээр сараас хойш бараг 40 хувиар буурчээ. Элон Маскийн улс төрд гүйцэтгэх үүрэг хариуцлагаас үүдэлтэйгээр "Тесла" компани "хар салхины хямрал"-тай тулгарсан гэж шинжээчид үзэж байна.