Тайванийн Батлан хамгаалах яам 2027 оныг Хятадын зүгээс түрэмгийлэл ирж магадгүй боломжит хугацаа гэж тодорхойлжээ. Тус яам Мягмар гаригт хууль тогтоогчид болон бусад албан тушаалтанд удахгүй хийх томоохон цэргийн сургуулилалтуудын товыг танилцуулсан. 2027 он гэх цаг хугацаа нь Ши Жиньпиний дэвшүүлсэн шинэчлэлийн зорилтуудтай нийцэж байна гэж мэдэгдэв.

Одоо үргэлжилж буй сургуулилалт нь аливаа түрэмгийллийн эсрэг хурдтай хариу арга хэмжээ авахад чиглэгдсэн бөгөөд таван өдөр үргэлжилнэ. Сургуулилалтын үеэр Хятадаас Тайванийн ойролцоох бүс нутаг руу 59 цэргийн нисэх онгоц болон бусад байлдааны хөлгийг илгээсэн. Хятад улс үүнийгээ салан тусгаарлах үзлийг сурталчилсаар байгаа Лаи Чин Тэд өгч буй хариу үйлдэл гэсэн юм.

Тодруулбал, Тайванийн дарга Лаи Чин Тэ саяхан Хятадыг гадаадын дайсагнагч хүчин гэж нэрлээд, Тайпэй илүү идэвхтэй арга хэмжээ авахаас өөр аргагүй гэж хэлжээ.

Хятадын довтолгооноос хамгаалах дадлага хийх зорилгоор жил бүр зохион байгуулдаг Хан Куан сургуулилалт энэ жил долдугаар сарын 9-нд болох төлөвтэй байна. Энэ жилийн сургуулилалтыг Хятадын цэргийн сургуулилалтын эрчимд үндэслэн хоёр удаагийн давтамжтайгаар төлөвлөгдөөгүй цагт хийх болжээ. Албаныхны мэдээлснээр Хятад улс арлын ойролцоо 7-10 хоног тутамд эргүүл хийх болжээ. Тиймээс сургуулилалтын хугацааг энэ жил хоёр дахин уртасгаж 10 өдөр болгосон нь цэргийн бэлэн байдал хэрхэн нэмэгдсэнийг онцолж байна.

Мөн Тайванийн зэвсэгт хүчнийг турших, шавхах зорилготой саарал бүсийн дарамт шахалт, 2027 оны болзошгүй довтолгоонд төвлөрч энэ жилийн сургуулилалтыг зохион байгуулна гэлээ.

"Хятадын Ардын чөлөөлөх армийн хувьд сургуулилалтыг довтолгоо болгон хувиргахад бидний төсөөлсөн шиг тийм их цаг хугацаа шаардагдахгүй. Тиймээс бид сэрэмжлүүлгийн чанартай шинж тэмдгүүдийг цуглуулж, хамгийн муу хувилбарт бэлтгэх ёстой" гэж Батлан ​​хамгаалахын сайд Веллингтон Ку хэлжээ.