Грекийн Коста Наварино хотноо өчигдөр/2025.03.20/ Олон улсын олимпийн хороо /ОУОХ/-ны 144 дүгээр чуулган боллоо. Энэ удаагийн чуулганы гол үйл явдал нь ОУОХ-ны дараагийн шинэ ерөнхийлөгчийг сонгох байсан юм. Улмаар 41 настай Кирсти Ковентри тус хорооны арав дахь ерөнхийлөгчөөр 49 хүний саналаар сонгогдов.

Түүний хувьд энэ том албан тушаалд сонгогдож буй анхны эмэгтэй, анхны Африк гаралтай хүн болж байна. Тэрбээр хэлсэн үгэндээ “Энэ бол зүгээр нэг нэр төрийн хэрэг биш юм. Би энэ байгууллагыг маш их бахархалтайгаар, үнэ цэнийг эрхэм болгон удирдан чиглүүлэх болно гэдгээ та бүхнийхээ өмнө хариуцлагтайгаар мэдэгдэж байна. Мөн та бүхний гаргасан шийдвэрт баярлаж байна. Хамтдаа бид олон гайхалтай ажлыг хийж бүтээх болно” гэжээ.

Кирсти Ковентри нь Зимбабве улсын Хараре хотод төрсөн бөгөөд усанд сэлэлтийн спортоор олимпийн наадамд 2 алт, 4 мөнгө, 1 хүрэл зэрэг нийт 7 медаль хүртэж байсан юм. Мөн 2018 оны есдүгээр сараас улс төрд орж улсынхаа Засгийн газрын залуучууд, урлаг, спортын сайдаар ажиллаж байв. Шинэ ерөнхийлөгч ирэх зургадугаар сарын 23-нд үүрэгт ажлаа хүлээн авна.